“Real” “Barselona”dan əl çəkmir: UEFA-dan tələb edir ki…

“Real Madrid” İspaniya texniki hakimlər komitəsinin keçmiş vitse-prezidenti Xose Mariya Enrikes Neqreyranın işi ilə əlaqədar olaraq “Barselona”nın titullarından məhrum edilməsi üçün UEFA-ya müraciət edib.

Publika.az xəbər verir ki, bu barədə İspaniyanın AS nəşri məlumat yayıb.

“Real Madrid” “Barselona”nın Avropa yarışlarından kənarlaşdırılmasında və 2001-2018-ci illər arasında qazandığı bütün titullardan məhrum edilməsində israr edir. Bu dövrdə Kataloniya klubunun hakimlər komitəsinin keçmiş vitse-prezidentinə onun nəzarətində olan şirkətlər vasitəsilə vəsait köçürdüyü iddia edilir.

Eyni zamanda, UEFA-nın bu cür sərt sanksiyaları dəstəkləməsi ehtimalının az olduğu qeyd olunur.

“Neqreyra məsələsi” İspaniya futbolundakı qalmaqalla bağlıdır. Bu qalmaqalda “Barselona” İspaniya hakimlər komitəsinin keçmiş vitse-prezidenti Xose Mariya Enrikes Neqreyraya külli miqdarda pul ödəməkdə ittiham olunur.

2023-cü ildə məlum olan məlumata görə, bu ödənişlər 2001-ci ildən başlayaraq uzun illər ərzində həyata keçirilib.

Katalonlar bu ödənişlərlə oyunlarının hakimliyinə təsir göstərməyə çalışmış ola bilərlər, baxmayaraq ki, klub pulun məsləhət xidmətləri üçün ödənildiyini iddia edir.

Florentino Peres iyunun 8-də yenidən “Real Madrid”in prezidenti seçildi. İndi o, bu vəzifəni ən azı 2029-cu ilə qədər tutacaq.