Meşədə qarajda yaşayırmış – Ukraynalı ulduz Rusiyada başına gələnlərdən danışdı

Ukrayna millisinin yarımmüdafiəçisi Aleksandr Zinçenko 2014-cü ildə Donetsk “Şaxtyor”undan ayrıldıqdan sonra Rusiyada keçirdiyi dövr haqqında danışıb.

Publika.az xəbər verir ki, o, bu barədə “Bombardier” YouTube kanalına verdiyi müsahibədə danışıb.

Zinçenkonun sözlərinə görə, o, həmin vaxt yetkinlik yaşına çatmadığı üçün Ukrayna ilə Rusiya arasında baş verən hadisələri tam başa düşmürmüş. Futbolçu bir müddət Moskvada çətin həyat şəraitində yaşadığını etiraf edib.

“Mən qarajda yaşayırdım. Əsl qaraj idi. Yatağım, tualetim və duşum var idi. Meşədə yerləşən qaraj idi. Formada qalmaq üçün hər gün bu meşədə qaçırdım”, – Zinçenko deyib.

O, həmçinin təkbaşına məşq etdiyini, formada qalmağa çalışdığını və karyerasını davam etdirmək üçün fürsətlər axtardığını da qeyd edib.

Futbolçu əlavə edib ki, formada qalmaq üçün bir ili küçələrdə, meşələrdə və həvəskar turnirlərdə keçirdib.

Qeyd etmək lazımdır ki, Zinçenko 2014-cü ilin yayında “Şaxtyor”dan ayrılıb. O vaxt “Rubin Kazan” yarımmüdafiəçini transfer etməyi düşünürdü. Nəticədə, 2015-ci ilin fevral ayında Zinçenko “Ufa” ilə müqavilə imzaladı və bir il sonra oradan “Mançester Siti”yə keçdi.

Müəllif: Tural