Rusiyada braziliyalı idmançıya 5,2 il həbs cəzası verildi

Sankt-Peterburqun “Lokomotiv” çimərlik voleybol klubunda oynamış braziliyalı idmançı Rusiyada həbs cəzasına məhkum edilib.

Publika.az xəbər verir ki, bu barədə “RİA Novosti” məlumat yayıb.

Məhkəmə sənədlərinə görə, 33 yaşlı Letisiya Villar Pais narkotik qaçaqmalçılığı və qanunsuz saxlamada təqsirli bilinib və ümumi rejimli cəzaçəkmə müəssisəsində beş il iki ay müddətinə azadlıqdan məhrum edilib.

Hadisə Estoniya sərhədində baş verib. İdmançının əl yükündə axtarış zamanı iyləyici it onun çantasına yaxınlaşıb və sərhədçilər 6,13 qram həşiş aşkarlayıblar. Qadın Leninqrad vilayətindəki nəzarət məntəqəsində saxlanılıb və nəzarətə götürülüb.

Məhkəmədə Villar Pais günahını tamamilə etiraf edib. O, narkotik maddəni Avropada aldığını və Rusiyada da qanuni olduğuna əmin olduğunu bildirib.

Voleybolçu həkimlərin boşanma və karyera çətinliklərindən qaynaqlanan ruhi sağlamlıq problemlərini müalicə etmək üçün kannabinoidlər təyin etdiyini iddia edib. Lakin məhkəmə bu halı yüngülləşdirici hesab etməyib.