Futbolu rahatlıqla tərk edirəm: Sabiq “Barsa”lı karyerasını bitirdi

İspaniyalı futbolçu Kristian Tello 35 yaşında butslarını mıxdan asmaq qərarına gəlib.

Publika.az xəbər verir ki, o, bu barədə “İnstaqram”da məlumat verib.

Futbolu həyatının bu fəslini dəyişdirməyin vaxtı olduğunu düşünür. O, futbolun ona xəyallarını gerçəkləşdirməyə və bir çox vacib anları yaşamağa imkan verdiyini bildirib:

“Futbol mənə hər şeyi verdi. Bir vaxtlar qeyri-mümkün görünən xəyalları gerçəkləşdirməyə, əbədi olaraq əziz tutacağım insanlarla tanış olmağa və ömrümün sonuna qədər yaddaşımda qalacaq anlar yaşamağa imkan verdi. Məni azarkeşlik edən, dəstəkləyən, tənqid edən və ya sadəcə orada olan hər kəsə ürəkdən təşəkkür edirəm.

Futbolu rahatlıqla tərk edirəm, keçdiyim səyahətlə bağlı böyük qürur hissi keçirirəm. Bu gün peşəkar futbolçu kimi karyeram başa çatır, amma futbolun mənə öyrətdiyi hər şey əbədi olaraq mənimlə qalacaq. Təşəkkür edirəm, futbol”.

Kristian “Barselona” akademiyasının yetirməsidir və əsas komandada 86 oyun keçirib.

O, həmçinin “Betis”, “Portu”, “Fiorentina”, “Los-Anceles”, “Əl-Fateh”, “Əl-Oruba” və “Palm City” klublarında da oynayıb. Tello klub səviyyəsində altı titul qazanıb və İspaniya gənclər komandası ilə Avropa çempionu olub.

Publika.az