Qvardiola müasir futbola zərər verdi - UEFA-nın vitse-prezidenti

UEFA-nın vitse-prezidenti Zbiqnev Bonek Pep Qvardiolanın oyun fəlsəfəsini tənqid edərək, ispan məşqçinin müasir futbola zərər verdiyini iddia edib.

Publika.az xəbər verir ki, “Yuventus” və “Roma”nın keçmiş oyunçusu bu haqda “Corriere dello Sport”a verdiyi müsahibədə danışıb:

“Qvardiolaya çox hörmətim var, amma o, futbolu məhv etdi. Onun oyunu prinsipə əsaslanır: sən mənə ötürmə verirsən, mən sənə ötürmə verirəm, sən mənə ötürmə verirsən, mən də sənə ötürmə verirəm. Sağa gedirik, sola qayıdırıq və oyunun sonuna qədər artıq 1788 ötürmə etmişik. Bunu bəyənmirəm. Şaquli oynayan və qol vurmağa çalışan komandaları bəyənirəm. İrəliləyən komandaları bəyənirəm”, – Bonek deyib.

O, İtaliya futbolundan müsbət nümunələr kimi “Latsio” və “Frozinone”ni seçərək, onların şaquli oynamaq və risk etmək istəklərini qeyd edib.

“Mən qol vurmağa çalışan futbolu sevirəm – minimum sayda ötürmə ilə. Onların sayı çox olmamalıdır, amma sürətli olmalıdırlar. Buna görə də inanıram ki, bu gün futbolda astalığa yer yoxdur. Asta oyunçuların artıq şansı yoxdur. Təkrar ötürmələr isə komandanı məhv edir”, – deyə keçmiş oyunçu əlavə edib.