"TikTok" milyonlarla dollar cərimə ödəyəcək - “ByteDance” geri çəkildi

“TikTok” 2023-cü ildə Britaniya İnformasiya Komissarının İdarəsi (ICO) tərəfindən tətbiq edilmiş 12,7 milyon funt-sterlinq (16,8 milyon dollar) məbləğində cərimədən şikayət apellyasiyasını geri götürüb.

Publika.az xəbər verir ki, bu barədə TASS məlumat yayıb.

Geri çəkilmə qərarı cərimənin ödənilməsi haqqında göstərişin qəti şəkildə qüvvəyə mindiyini bildirir.

““TikTok” cərimədən şikayət etmişdi, lakin indi apellyasiyanı geri götürüb ki, bu da cərimə sərəncamının qəti şəkildə qüvvəyə minməsi deməkdir”, – deyə ICO-dan bildiriblər.

Sanksiyaya 13 yaşından kiçik uşaqların fərdi məlumatlarının işlənməsi qaydalarının pozulması səbəb olub. ICO-nun məlumatına görə, 2020-ci ildə təxminən 1,75 milyon britaniyalı bu yaşda uşaq xidmətin qaydalarının qeydiyyatdan keçməyə icazə verməsinə baxmayaraq, “TikTok”dan istifadə edib. Böyük Britaniya qanunvericiliyi şirkətlərdən onlayn xidmətlər göstərərkən 13 yaşından kiçik uşaqların məlumatlarının işlənməsi üçün valideynlərin və ya qəyyumların razılığını almalarını tələb edir.

Xatırladaq ki, sentyabr ayında “TikTok”un yaradıcısı Çjan İmin hindistanlı sahibkar Qautam Adanini qabaqlayaraq ilk dəfə Asiyanın ən varlı adamı olub.

“TikTok” qısa videoların dərc edilməsi platformasıdır. O, 2017-ci ildə istifadəyə verilib, xidmətin beynəlxalq versiyası isə 2018-ci ilin avqustunda ortaya çıxıb. Sosial şəbəkənin sahibi Çinin “ByteDance” texnologiya şirkətidir.

Hüseyn İbadlı