"Azərenerji"nin zərəri 3 milyarda yüksəldi

“Azərenerji” ASC 2020-ci ili 206,924 milyon manat zərərlə başa vurub.

Bu, 2019-cu ilə nisbətən 9,6% azdır.

Bununla belə, hesabat dövründə qurumun yığılmış zərəri 8,15% artaraq 2 748,472 milyon manata çatıb.

2020-ci ildə “Azərenerji”nin enerji satışından gəlirləri 1 073,179 milyon manat (2019-ci illə müqayisədə 2,9% az), elektrik şəbəkəsinə qoşulma xidmətindən və digər satış gəlirləri 1,237 milyon manat (37,9% çox), yanacaq xərcləri 509,649 milyon manat (1,9% az), köhnəlmə və amortizasiya xərcləri 193,814 milyon manat (2,3% çox), heyətlə bağlı xərcləri 71,775 milyon manat (27,9% az), təmir və texniki xidmət xərcləri 110,054 milyon manat (41,5% çox), xammal və materiallar üzrə xərcləri 14,172 milyon manat (40,2% çox), alınmış elektrik xərcləri 8,673 milyon manat (5,7% çox), ƏDV-nin dəyərsizləşməsi ehtiyatında dəyişiklikdən zərəri 4,861 milyon manat (2019-ci ildə gəlir olub), maliyyə xərcləri 35,932 milyon manat (13,1% az), xarici valyuta mübadiləsindən zərəri 83,79 milyon manat (2019-cu ildə gəlir olub), kreditor borcların və kreditlərin silinməsindən gəlirləri 1,419 milyon manat (8,3 dəfə çox), əmlak, tikili, avadanlıq və əmlak, tikili və avadanlığın alınması üçün verilmiş avanslar üzrə dəyərsizləşmə itkisi 175,133 milyon manat (52,7% az), digər xərcləri 25,655 milyon manat (5,65% çox), mənfəət vergisi ödəmələri 10,684 milyon manat (69,2% az), digər vergi ödəmələri isə 38,567 (6,3% çox) təşkil edib.

2020-ci il yanvarın 1-nə “Azərenerji”nin aktivləri 4 027,564 milyon manat olub ki, bu da 1 il əvvələ nisbətən 2,7% çoxdur. Hesabat dövründə səhmdar cəmiyyətinin öhdəlikləri 1,4% artaraq 2 580,589 milyon manata, balans kapitalı isə 5% artaraq 1 446,975 milyon manata çatıb.

Xatırladaq ki, "Azərenerji" 1997-ci ildə yaradılıb. Onun nizamnamə kapitalı 1 760,495 milyon manatdır. 100% dövlətə məxsus qurum ölkənin əsas enerji istehsalçısı və ixracatçısıdır.(Report)