“Məhəllə 3” FİLMİ GƏLİR: Qüdrətsiz... - VİDEO

“Məhəllə 3” filmindən ilk fraqmentlər təqdim olunub.

Publika.az xəbər verir ki, qurluşçu rejissoru Ramiz Fətəliyev, ssenari müəllifi isə Tahir İmanova aid olan “Məhəllə” filminin 3-cü hissəsinin çəkilişləri artıq başa çatıb. Ekran işində “Bakılı oğlanlar” komandasının üzvləri Bəhram Bağırzadə, Əməkdar artistlər Tahir İmanov, Cabir İmanov, Dilarə Əliyeva və Xalq artisti Haci İsmayılov yer alıb. Layihənin rejissoru və ssenari müəllifləri Tahir və Cabir İmanov qardaşlarıdır. "Məhəllə 3"ün qala gecəsi martın 3-ü Heydər Əliyev sarayında baş tutacaq.

Qeyd edək ki, Rafael İsgəndərov, Coşqun Rəhimov, Kübra Əliyeva, İlham Qasımov, eləcə də ssenarist olaraq Müşfiq Abbasov “Məhəllə 3”ün heyətinə daxil edilməyib. Əməkdar artist Dilarə Əliyeva isə ekran işində yer alacaq. Köhnə qəhrəmanların filmə daxil edilməməsi sosial şəbəkələrdə müzakirə mövzusu olub. Filmin izləyiciləri əvvəlki heyətin filmdə rol almamasını tənqid edərək "Qüdrətsiz Məhəbbət maraqsız olacaq" kimi rəylər yazılıb.

Məlumat üçün bildirək ki, film kiçik bir məhəllə və bu məhəllənin sakinlərinin başına gələn məzəli əhvalatlardan danışır. Film unudulmaz bəstəkar Süleyman Ələsgərov və həyat yoldaşı Ağgül xanımın 80 illik yubileylərinə ithaf olunub.

Onu da xatırladaq ki, mərhum aktrisa Nəsibə Zeynalovanın kinoda son işi “Məhəllə” filmi olub.