Ali Sunalın çəkdiyi filmin Bakıda qala gecəsi baş tutdu - FOTO

Dünən Gənclik Mall Cinema Plusda “Haraket sekiz” filminin təqdimatı baş tutub.

Publika.az xəbər verir ki, qala gecəsində filmin baş qəhrəmanları Ali Sunal, Hande Hatipoğlu, Onur Atilla, Pərvin Abıyeva, İslam Mehrəliyev, Elcan Rəsulov və başqaları iştirak edib.

Ali Sunal jurnalistlərə "Hereket sekiz" filmi haqqında təəssüratlarını bölüşüb:

“Çəkilişlər şahanə keçdi. İnsanlar səmimidir, Bakıda heç ögeylik hiss etmədik. Əsas hadisələr 3 bacarıqsız polisin ətrafında cərəyan edir. Bu film rus mafiyasının izinə düşən bir qrup polisin başına gələn gülməli olaylardan və onların dünyanı xilas etmə cəhdlərdindən danışır. Məncə, seyrçini əyləndirən bir komediya olacaq.

Filmdə hadisələrin bir hissəsi Azərbaycanda baş tutur. Burda da çox sevildiyimizi bilirik. Sosial şəbəkələrdə azərbaycanlı izləyicilərdən davamlı olaraq mesajlar gəlirdi, Bakıya dəvət edirdilər. “Haraket sekiz” bizə belə şans təqdim etdi. Filmdə Azərbaycanlı həmkarlarım da rol alıb, onlarla çox rahat çalışdıq, sanki illərdir tanışıq. Mədəniyyətlərin bir-birinə yaxın olması çəkilişlərdə bizim üçün faydalı oldu”.

Daha sonra aktyor çəkilişlərdə başlarına gələn hadisələrdən danışıb: “Gülməkdən çəkə bilmədiyimiz səhnələr oldu. Çətinliyimiz sadəcə bu sarıdan idi. Gülməmək üçün özümüzü güclə saxlayırdıq”.

Bu yaxınlarda ata olan Ali Sunal qızı haqqında da duyğularını dilə gətirib: “Qızım olduqdan sonra həyatımda hər şey dəyişdi. Əvvəllər özümün, ailəmin və həyat yoldaşımın məsuliyyətini daşıyırdım. İndi bütün fikrim-zikrim qızımdadır. Həyatda yaşaya biləcəyiniz ən gözəl duyğudur, heç gözünüzü qorxutmasın”.

Qeyd edək ki, ekran işinin bir hissəsi İstanbulda çəkilib. Baş rollarda Ali Sunal, Devrim Yakut, Gürgen Öz, Hande Katipoğlu, Onur Atilla və Hakan Bilgin yer alıb.

Aytən Məftun

Foto: Ceyhun Rəhimov