Aysel karantin günlərinin növbəti hitini TƏQDİM ETDİ – VİDEO

Ötən il Rusiyanın “Playlist MosArtist” layihəsinin qaliblərindən biri olan, 2018-ci ildə ölkəmizi “Eurovision” mahnı müsabiqəsində təmsil edən, bəstəkar-pianoçu və ən nəhayət yeni nəfəs verdiyi “Dilbərin ariyası” kompozisiyası ilə sevilən müğənni Aysel Məmmədova yayın yeni hiti olmağa iddia olan mahnısını təqdim edib.

Publika.az xəbər verir ki, karantin günlərində özünü tamamilə yaradıcılığa həsr edən ifaçının “Bu bir sondur” adlı nəğməsi yutub kanalında dinləyicilərin ixtiyarına verilib. Bir müddətdir ki, tizeri təqdim edilən mahnının sözləri və musiqisi sənətçinin özünə, səs prodüserliyi isə Emin Kərimiyə aiddir.

Adətən rus və ingilis dilində kompozisiyalar ifa edən ulduzun belə görünür ki, bu yayı dincəlmək niyyəti yoxdur. O, bu uzun karantin günlərində dinləyicilərinin darıxmaması üçün əlindən gələni edir.

Məlumat üçün bildirək ki, Aysel Məmmədovanın bu günlərdə şairlik istedadı da üzə çıxıb. Belə ki, onun “Sevirəm”, “Demə mənə neyləyim” mahnılarının da sözləri özünə aiddir. Aranjeman isə yenə Emin Kərimiyə məxsusdur.