Sabiq nazir və xanımı eyni gündə öldü - FOTO

Niderlandın keçmiş Baş naziri Dris van Aqt və həyat yoldaşı Yevgeniya fevralın 5-də, ikisi də eyni gündə evtanaziya ilə vəfat ediblər.

Publika.az xəbər verir ki, bu barədə “The Guardian” məlumat yayıb. Hər ikisinin 93 yaşı olub. Siyasətçinin qohumlarından biri, rejissor Cerard Cokmanın dediyinə görə, van Aqt xəstə idi, 2019-cu ildə baş verən beyin qanamasından sağala bilmirdi, həyat yoldaşı isə xərçəngdən əziyyət çəkib. Rejissorun sözlərinə görə, cütlük çox xəstə idi, lakin bir-birləri olmadan yaşamaq istəməyiblər.

Onlar 70 ilə yaxın bir yerdə yaşayıblar. Evtanaziya ilə məşğul olan "Expertisecentrum Euthanasie" şirkətinin nümayəndəsi Elke Svart mediaya verdiyi açıqlamada bildirib ki, ölkədə qoşa evtanaziya populyarlıq qazanır, lakin bu, hələ də nadirdir. Ona görə ki, cütlüklərin hər ikisində ağır xəstəlik nadir hallarda baş verir.

"İki insanın eyni vaxtda dözülməz dərəcədə əziyyət çəkməsi tamamilə təsadüfdür, rahatlıq və ümid yoxdur", - Elke Svart qeyd edib.

Niderland dünyada evtanaziyanı qanuniləşdirən ilk ölkə olub, bu, 2002-ci ildə baş verib. Dris van Aqt 1977-1982-ci illərdə ölkənin baş naziri və 1980-ci ildə yaradılmış Xristian Demokratik Müraciət Partiyasının ilk lideri olub.