Belarusdan ŞOK QƏRAR: ölüm cəzası tətbiq ediləcək

Belarusda dövlətə xəyanətə görə ölüm cəzası tətbiq edə bilərlər.

Publika.az Rusiya KİV-nə istinadla xəbər verir ki, ölkə parlamentinin aşağı palatasının deputatları birinci oxunuşda müvafiq qanun layihəsinə səs veriblər. Sənəd Belarus Silahlı Qüvvələri haqqında saxta məlumatların yayılmasına görə cinayət cəzasının tətbiqini də nəzərdə tutur.

Xəyanətə görə ölüm

Belarus Milli Assambleyasının Nümayəndələr Palatasının deputatları “Cinayət məsuliyyəti haqqında məcəllələrə dəyişiklik edilməsi haqqında” qanun layihəsini birinci oxunuşda qəbul ediblər. Sənədə əsasən, dövlətə xəyanətə görə məmur ölüm cəzasına məhkum edilə bilər.

Belarus Nümayəndələr Palatasının mətbuat xidmətinin məlumatına görə, “qanun layihəsində Cinayət Məcəlləsinin 356-cı maddəsinin ikinci hissəsinin sanksiyasına düzəlişlər təklif olunur” – Dövlətə xəyanət. Yeniliklər “dövlət vəzifəsini tutan vəzifəli şəxs və ya hərbi qulluqçu statusuna malik şəxs tərəfindən dövlətə xəyanətə görə ölüm cəzası şəklində müstəsna cəza tədbirinin tətbiqi imkanını” nəzərdə tutur.

“Bununla bağlı Cinayət Məcəlləsinin 58 və 59-cu maddələri (“Ömürlük azadlıqdan məhrum etmə” və “Ölüm cəzası”) da uyğunlaşdırılır”, - məlumatda deyilir.

Mətbuat xidməti onu da qeyd edib ki, qanunvericiliyə “dağıdıcı elementlərə qarşı çəkindirici təsir göstərmək, habelə dövlətə xəyanətə qarşı qətiyyətli mübarizə nümayiş etdirmək” məqsədilə dəyişikliklər edilir.

Hüseyn İbadlı