Rusiyanın nüvə bunkerinin inşaatçısı HƏBS EDİLDİ

Moskvanın Zamoskvoretski Məhkəməsi Fövqəladə Hallar Nazirliyinin Ümumrusiya Mülki Müdafiə və Fövqəladə Hallar üzrə Tədqiqat İnstitutunun rəis müavini İqor Sosunovu rüşvət ittihamı ilə həbs edib.

Publika.az xəbər verir ki, bu barədə TASS məlumat yayıb.

Bildirilib ki, eyni institutun digər tədqiqat mərkəzinin rəhbəri Nikolay Posoxov da eyni ittihamlarla ev dustaqlığına buraxılıb.

Hər iki təqsirləndirilən şəxs xüsusilə külli miqdarda rüşvət almaqda ittiham olunur. Bu ittiham üzrə cəza 15 ilə qədər həbs cəzasıdır.

Fövqəladə Hallar Nazirliyinin Ümumrusiya Mülki Müdafiə və Fövqəladə Hallar üzrə Tədqiqat İnstitutu (VNIIGOChS) mülki müdafiə, fövqəladə halların qarşısının alınması və aradan qaldırılması sahəsində elmi tədqiqatlar aparır.

"İzvestiya" əvvəllər yazıb ki, 2015-ci ildə Mülki Müdafiə və Fövqəladə Hallar üzrə Tədqiqat İnstitutu Fövqəladə Hallar Nazirliyinin sifarişi ilə KUB-M modul qoruyucu konstruksiyası üzərində işə başlayıb. İstehsala 2024-cü ildə Nijni Novqorod vilayətində başlayıb.

KUB-M səyyar sığınacağı insanları təbii fəlakətlərdən, texnogen qəzalardan, nüvə silahından istifadə zamanı radiasiyadan və hava partlayışından qoruya bilər. Burada 54 nəfər, üstəgəl texniki bölmə yerləşə bilər. KUB-M insanları 48 saat qoruya bilər. Əlavə modullar əlavə etməklə onun tutumu artırıla bilər.

Hüseyn İbadlı