Mədəniyyət

Türkiyəli 75 sənətçinin Şəkidə konserti olacaq

29 İyun 2015 10:38

Şəkidə Türkiyə Adana vilayəti “Çukurova” dövlət simfonik orkestrinin konserti olacaq.

Publika.az-ın məlumatına görə, konsert 1–10 iyul tarixində şəhərdə keçiriləcək “Şəki Beynəlxalq İpəkyolu Musiqi Festivalı” çərçivəsində baş tutacaq. Səhnəyə 75 nəfərlik heyətlə çıxacaq olan türkiyəli qonaqlar bir çox yerli və xarici film musiqilərini səsləndirəcəklər. Artıq bir neçə gündür məşq edərək konsertə hazırlaşan heyətin bu gün Azərbaycana gələcəyi gözlənilir. Konserti azərbaycanlı drijor Fəxrəddin Kərimov idarə edəcək. Orkestrin bədii rəhbəri Okan Urşan daha əvvəl Türkiyə-Azərbaycan qardaşlığını tərənnüm etmək üçün Adanada konsert verdiklərini, növbəti konsertin isə Şəkidə olacağını deyib. Urşan həmçinin konsertin ölkələrin və şəhərlərin tanıdılması baxımından əhəmiyyət kəsb etdiyini qeyd edib.