Mədəniyyət

Azərbaycan və Türkiyə bəstəkarları yeni layihə təqdim edəcəklər

1 İyul 2015 10:30

Yaxın günlərdə Azərbaycan Bəstəkarlar İttifaqı və Türkiyə Bəstəkarlar Cəmiyyətinin ortaq layihəsi musiqi ictimaiyyətinə təqdim ediləcək.

Azərbaycan Bəstəkarlar İttifaqından Publika.az-a bildiriblər ki, layihədə hər iki tərəfdən 6 bəstəkar və 6 şair iştirak edəcək.

Baş tutacaq möhtəşəm musiqi layihəsində Azərbaycanın 6 bəstəkarı Türkiyənin seçilən 6 şairinin şeirlərinə, eyni zamanda türk bəstəkarları da Azərbaycanın 6 şairinin şeirlərinə musiqi bəstələyəcək. Daha sonra təqdimatı hər iki ölkədə keçiriləcək layihədə iştirak edəcək şair və bəstəkarların adlarının hələ tam məlum olmadığı bildirilib.

Qeyd olunub ki, bu sahədə həyata keçəcək qarşılıqlı silsilə tədbirlər, hər iki ölkənin musiqi sahəsindəki əməkdaşlığına təkan verəcək.