Tehrandan Trampa göndərilən hədiyyə: ABŞ İranda kimlərlə danışıq aparır?

İran rəsmiləri ABŞ ilə sülh danışıqlarına vasitəçilik etmək istəyən ölkələrə Donald Trampın artıq iki dəfə onları aldatdığını və "bir daha aldanmaq istəmədiklərini" bildiriblər.

Publika.az xəbər verir ki, bu barədə “Axios” müzakirələrdən birbaşa xəbərdar olan mənbəyə istinadən məlumat yayıb.

ABŞ cümə axşamı Pakistanın paytaxtı İslamabadda şəxsən sülh danışıqlarının keçirilməsində israr edir. Lakin İran rəsmiləri vasitəçilərə - Pakistan, Misir və Türkiyəyə - ABŞ qoşunlarının hərəkəti və Trampın böyük əlavə qüvvələr göndərmək qərarının onun sülh danışıqlarının sadəcə bir hiylə olduğuna dair şübhələrini artırdığını bildiriblər.

Mma ABŞ tərəfi bildirir ki, Tramp administrasiyası üçün bu addım, onun pis niyyətlə danışıqlar apardığının deyil, silahlı qüvvələrlə danışıqlara ciddi yanaşdığının əlamətidir.

Trampın müşavirlərindən biri deyib: "Onun bir əli razılaşma üçün açıqdır, digəri isə sadəcə üzünüzə yumruq vurmaq üçün gözləyir".

Ağ Ev iranlılara Trampın danışıqlara ciddi yanaşdığı barədə mesajlar göndərib və vitse-prezident Cey Di Vensin danışıqlarda mümkün iştirakını sübut kimi göstərib.

Çərşənbə axşamı Tramp jurnalistlərə iranlılarla etimad yaratmaq üçün açıq-aşkar səylər barədə danışıb. O, "Onlar dünən həqiqətən olduqca diqqətəlayiq bir şey etdilər" deyib.

Tramp deyib: "Bizə hədiyyə verdilər və hədiyyə bu gün gəldi. Bu, çox böyük bir hədiyyə idi və çox böyük pula başa gəldi".

Tramp ətraflı məlumat vermədən İranın "hədiyyəsinin" neft və qazla, Hörmüz boğazındakı axınla əlaqəli olduğunu söyləyib. Tramp iddia etdi ki, bu, ABŞ-ın Tehrandakı düzgün insanlarla münasibət qurduğunu göstərir.

"Onlar bunu edəcəklərini dedilər və bu baş verdi və bunu edə biləcək yeganə insanlar onlar idi", - deyə o bildirib.

Eyni zamanda, ABŞ və İsrail rəsmilərinin fikrincə, Tramp hadisələrin gedişatına əsaslanaraq qərarlar qəbul edə bilməsi üçün eyni zamanda diplomatik və hərbi eskalasiya variantlarını nəzərdən keçirməyə çalışır.

Bu rəsmilər danışıqlar baş tutsa belə, müharibənin daha iki-üç həftə davam edəcəyini deyirlər. Ağ Ev sözçüsü bildirib ki, çərşənbə axşamı Tramp müdafiə naziri Pit Heqsetə İrana qarşı hərbi təzyiqi davam etdirməyi tapşırıb.

Danışıqlara başlamaq səyləri hələ ki, Pentaqonun ABŞ Mərkəzi Komandanlığına hərbi əməliyyatlar və planlaşdırma ilə bağlı verdiyi əmrlərdə heç bir dəyişikliklə nəticələnməyib.

Tural