Münaqişə başlayandan bəri ilk dəfə üz-üzə gəldilər - Ərəb ölkəsi riskləri minimuma endirmək istəyir

Birləşmiş Ərəb Əmirlikləri və İranın milli təhlükəsizlik məsələlərinə cavabdeh olan yüksək vəzifəli nümayəndələri ABŞ və İsrailin İrana qarşı müharibəsi başlayandan bəri ilk dəfə üz-üzə görüş keçiriblər.

Publika.az xəbər verir ki, bu barədə məlumatı mənbələrə istinadla "Bloomberg" agentliyi yayıb.

Agentliyin məlumatına görə, bu həftə baş tutan danışıqlar hər iki ölkənin ikitərəfli münasibətlərdə gərginliyi azaltmaq istəyi fonunda mühüm bir addım olub. Görüşün təşəbbüskarı əsasən Abu-Dabi olub və onun Tehranla dialoqu normallaşdırmaqda maraqlı olduğu bildirilir.

"Bloomberg"in həmsöhbətləri qeyd ediblər ki, BƏƏ hakimiyyəti hazırda ölkənin iqtisadiyyatı və milli təhlükəsizliyi üçün mümkün riskləri minimuma endirməyə diqqət yetirir. Agentliyin qiymətləndirməsinə görə, bu yanaşma Abu-Dabinin münaqişənin erkən mərhələlərində tutduğu daha sərt mövqedən fərqlənir.

Xatırladaq ki, fevralın 28-də ABŞ İsraillə birlikdə İrana qarşı hərbi əməliyyatlara başlayıb. İslam Respublikasının bir çox şəhərləri, o cümlədən paytaxtı hücuma məruz qalıb və zərbələrdən biri ali rəhbər Əli Xameneinin iqamətgahına düşüb, nəticədə o, həlak olub. Buna cavab olaraq İran İsrailə və Yaxın Şərqdəki, o cümlədən Səudiyyə Ərəbistanı, Bəhreyn, Qətər, Küveyt və BƏƏ-dəki Amerika aviabazalarına raket və dron zərbələri endirməyə başlayıb.

Hüseyn İbadlı