"Dərnəgül" Mübadilə Mərkəzi nə zaman fəaliyyətə başlayacaq? - AÇIQLAMA

Metronun "Dərnəgül" stansiyası yaxınlığındakı ərazidə yaradılan Nəqliyyatı Mübadilə Mərkəzinin yanvarın 13-də fəaliyyətə başlanması planlaşdırılsa da, proses gecikir.

Bu barədə Publika.az-a açıqlama verən Bakı Nəqliyyat Agentliyinin mətbuat xidmətinin rəhbəri Mais Ağayev gecikmənin bəzi texniki çatışmazlıqlarla əlaqədar olduğunu deyib:

“Hər hansı mərkəz fəaliyyətə başlamamışdan əvvəl orada baxış keçirilir. Əgər tələblərə cavab vermirsə, gecikmə ola bilər. “Dərnəgül” Mübadilə Mərkəzinin də fəaliyyətə başlaması üçün bir sıra texniki problemlər var, onların həll edilməsini gözləyirik”.

M.Ağayev onu da vurğulayıb ki, Mübadilə Mərkəzinin fəaliyyətə başlaması ərazidəki ətraf kənd və qəsəbələrdən “Azadlıq prospekti” metro stansiyasına gələn marşrut xətlərinin son dayanacaqları dəyişdiriləcək:

“Bununla da günün pik saatlarında metronun “Azadlıq prospekti” stansiyası ətrafında nəqliyyatın xaotik hərəkətinin qarşısı alınacaq və sıxlığı aradan qaldırmaq mümkün olacaq. Mübadilə Mərkəzində dayanacaqlar quraşdırılıb. Hər bir dayanacaqda avtobusların hərəkət sxemləri əks olunacaq”.

"Dərnəgül” Mübadilə Mərkəzi istifadəyə veriləndən sonra 100, 108, 123,134, 147, 155 marşrut xətlərinin son dayanacaq məntəqəsi "Dərnəgül” NMM-nə köçürüləcək. Nəzərdə tutulan fəaliyyət planına uyğun olaraq daha sonra 6, 8, 45 və 71 nömrəli marşrut xətti üzrə də avtobusların "Dərnəgül” NMM-nə hərəkət edəcək.

Gülxar