Ermənistan prezidentinin istefasında KREML İZİ

"Ermənistanın istefa vermiş prezidenti Armen Sarkisyan ölkənin Rusiya tərəfindən qəbul edilməyən yeganə dövlət rəhbəri idi. O, prezidentliyi dövründə əsas müttəfiqimiz olan Rusiyanın dövlət başçısı tərəfindən heç vaxt rəsmi qəbul edilməyib".

Publika.az">Publika.az erməni mediasına istinadla xəbər verir ki, bunu politoloq Edqar Qazaryan deyib.

Politoloq bildirib ki, "Kremlin divarları altında qalan və oradan içəri girməyən" yeganə Ermənistan prezidenti məhz Armen Sarkisyan olub:

"Fakt odur ki, Armen Sarkisyan hakimiyyətdə olduğu 4 il ərzində heç vaxt Rusiya prezidenti tərəfindən rəsmi qəbul olunmadı. Hətta Böyük Vətən Müharibəsinin ildönümü günü, 2021-ci il mayın 9-da Moskvada olan Ermənistan prezidenti gül və əklil qoymaqla kifayətlənərək "Qızıl Meydan"dakı hərbi parada, eləcə də digər rəsmi tədbirlərə dəvət edilmədi. Moskva qəbiristanlıqlarında erməni generallarının məzarlarına əklil qoymaqla kifatətləndi. Məncə, onun istefasını sürətləndirən səbəblərdən biri də bu idi".

Qeyd edək ki, Ermənistanın 4-cü prezidenti Armen Sarkisyan yanvarın 23-də istefa verdiyini açıqlayıb.

Tural Turan