Ölümlə hədələnən Tahir Kərimli ilə bağlı DİN-dən AÇIQLAMA

Ötən gün Milli Məclisin deputatı, Vəhdət Partiyasının (VP) sədri Tahir Kərimli sosial şəbəkələrdə yayılan video-müraciətində təhdid olunduğunu bildirib.

Millət vəkili Tahir Kərimli oyuncaq əjdaha ilə video çəkərək onu ölümlə hədələyənlərə səslənib:

“Ey məni ölümlə hədələyən, sən məni öldürməklə adi bir insanı ortadan götürəcəksən. Amma mənim yerimə minlərlə oğul yetişəcək ki, onlar dövlətimizi daha da irəli aparacaq. Sən heç kimsən”.

Bəs partiya sədri, millət vəkili Tahir Kərimli ona qarşı olan təhdidlərlə bağlı Daxili İşlər Nazirliyinə müraciət edibmi?

Daxili İşlər Nazirliyinin (DİN) Mətbuat Xidmətinin Media və İctimaiyyətlə əlaqələr şöbəsinin rəisi Elşad Hacıyev Publika.az-a açıqlamasında bildirib ki, millət vəkili Tahir Kərimlidən daxili işlər orqanlarına şikayət xarakterli hər hansı müraciət daxil olmayıb.

Daxili İşlər Nazirliyinin (DİN) Mətbuat ximdətinin rəisi, polis polkovniki Ehsan Zahidov isə bildirib ki, məsələ ilə bağlı təmsil etdiyi quruma heç bir müraciət daxil olmayıb:

“Millət vəkilinin daxili işlər orqanlarına bununla bağlı heç bir müraciəti yoxdur”.

Vəhdət Partiyasından da bildirildi ki, Tahir Kərimlinin ölüm təhdidi ilə bağlı Daxili İşlər Nazirliyinə müraciət olunub-olunmaması ilə bağlı xəbərsizdilər.