Şuşa Bəyannaməsi – gərginliyə zərbə

“Türkiyə və Azərbaycan arasında müttəfiqlik münasibətləri Şuşa Bəyannaməsi ilə bütün parametrlərdə davam edir. Məhz ötən günlərdə Şuşa Bəyannaməsi ilə bağlı irəli gələn maddələri iki dövlət rəsmiləri müzakirə etdilər”.

Bunu Publika.az">Publika.az-a açıqlamasında siyasi şərhçi Məhəmməd Əsədullazadə deyib.

Ekspertin sözlərinə görə, regionda siyasi-hərbi vəziyyət gərgindir: “Bundan əlavə, Azərbaycan-Ermənistan və Türkiyə-Ermənistan əlaqələrinin normallaşması istiqamətində danışıqlar var. Rusiya-Ukrayna müharibəsinin regiona təsirləri kimi məsələlər də prezidentlərin görüşündə masaya yatırılıb. Türkiyə və Azərbaycanın bundan sonra da koordinasiyalı şəkildə xarici siyasətdə fəaliyyətlərini uzlaşdırmaq və riskləri neytrallaşdırmaq baxımından məsələlər ətrafında geniş müzakirələrin aparıldığı şübhəsizdir”.

M.Əsədullazadə vurğulayıb ki, xüsusilə Şuşa Bəyannaməsi və digər razılaşmaların icrası hazırkı situasiyada mütləqdir: “Zəngəzur dəhlizinin açılmasının, Rusiya sülhməramlı qüvvələrinin məsuliyyət zonasında yerləşən qanunsuz silahlı birləşmələrin təxribatları və bunun sülh müzakirələrinə vurduğu zərbənin də müzakirə edilməsini istisna etmirəm. Regionda ciddi dəyişikliklər var və bu səbəbdən hər iki ölkə prezidentlərinin görüşünün xüsusilə Ermənistanla bağlı nəticəsinin regionumuzda şahidi olacağıq”.