Məşhur brendin cəlbi əməkdaşlıq imkanlarını artıracaq - İqtisadçı

Azərbaycan və İtaliya arasındakı iqtisadi əlaqələr çox yüksək səviyyədə qurulub.

Bunu Publika.az-a açıqlamasnda iqtisadçı Xalid Kərimli deyib.

İqtisadçı qeyd edib ki, Azərbaycan Avropanın ən böyük iqtisadiyyata malik ölkələrindən olan İtaliyanın neft istehlakının təqribən 17 faizini təmin edir: “İtaliyaya ixrac etdiyimiz neft Azərbaycanın ümumi daxili məhsulunun (ÜDM) təxminən 12 faizinə bərabərdir. Yəni ölkəmiz neft ixracatının böyük hissəsini bu ölkə üzərindən həyata keçirir. Növbəti addım da TAP layihəsidir. Bununla da qazı birbaşa İtaliya bazarına çıxaracağıq. Hazırda qazın ixracı ilkin qiymətləndirməyə görə 10 milyard kubmetr təşkil edir ki, göstəricini 20 milyarda çatdırmaq planlaşdırılır. Azərbaycanı maraqlandıran əsas məsələlərdən biri də qeyri-neft sektoruna investisiyaların yatırılmasıdır. Baş tutan görüşlər, xüsusən də biznes sektoru ilə bağlı əməkdaşlığın Prezident səviyyəsində təşkil olunması italiyalı biznesmenlərin diqqətini daha çox çəkəcək. Bundan sonra onlar Azərbaycan bazarında investisiya qoyulacaq sahələrlə daha yaxından maraqlanacaqlar. Xüsusən də Qafqazda çox populyar olan “Made in Italy” kimi brendi maliyyə sektoruna cəlb etmək əməkdaşlıq imkanlarını artıra bilər. Eyni zamanda ölkələrarası əməkdaşlıq Azərbaycanda pambıqçılığın inkişafına töhfəsini verəcək”.

Tağı Həsənov