“Bu həm də dövlətin siyasətinə qarşı təxribatdır” - Aydın Quliyev

“Dövlətin indiki şəraitdə apardığı siyasəti, insanların sosial rifahının yaxşılaşdırılmasına yönəlmiş addımları, eləcə də koronavirusdan birbaşa müdafiə üçün atılan bütün tədbirləri bütün cəmiyyət görür. Bunların içində aztəminatlı ailələrə Azərbaycan dövlətinin adından Prezidentin etdiyi müxtəlif yardımlar xüsusilə diqqəti cəlb edir. Bu, həm ölkədə, həm də dünyada təqdirəlayiq bir addım kimi qarşılanır”.

Bunu Publika.az-a açıqlamasında "Bakı Xəbər" qəzetinin baş redaktoru Aydın Quliyev deyib.

O qeyd edib ki, aztəminatlı insanlara ayrılan ünvanlı yardımların mənimsənilmısi həm hüquqi nöqteyi-nəzərdən, həm də mənəvi baxımdan ağır və bağışlanmaz bir cinayətdir: “Əvvəla, dövlət indiki şəraitdə həmin insanlara kömək edilməsini vacib bilir və yardım edir. İkincisi, bu yardımların mənimsənilməsi həm dövlətin siyasətinə qarşı bir təxribatdır, həm də yardımın ayrılması vacib hesab edilmiş həmin əhali təbəqəsinə ikinci ağır sarsıdıcı zərbədir. Buna görə də cənab Prezident haqlı olaraq bu mənimsənilməni çox ağır bir mənəvi cinayət kimi xarakterizə etdi. Güman edirəm, ölkə başçısı İlham Əliyevin bu xəbərdarlığı bundan sonra əlaqədar şəxslər və məmurlar üçün çox ciddi bir siqnal olacaqdır ki, bir daha bu cür cinayətlərə yol verməsinlər. Düşünürəm ki, məmurlar bundan sonra həmin cinayətləri törətməkdən yan keçəcəklər. Biz bunu gözləyirik”.

Akqabay Mıradov