Bu, COVAX-a olan inamı azaldır - Məşhur Məmmədov

"Gözəgörünməz düşmənlə mübarizə 1 ildən artıqdır davam edir. Pandemiya ərzində 2,7 milyondan çox insan həyatını itirib. Koronavirusla mübarizədə ən vacib silah peyvənddir. Peyvəndin təchizatı məsələsindəki bərabərsizlik ziddiyyətlərə səbəb olub. Təəssüf ki, Azərbaycan haqsızlığa məruz qalan ölkələrdən biridir".

Bunu Publika.az-a açıqlamasında millət vəkili Məşhur Məmmədov deyib. Millət vəkili bildirib ki, Azərbaycan peyvənd təminatı ilə məşğul olan beynəlxalq COVAX proqramının ilk üzv ölkələrindən biridir:

"Lakin COVAX Azərbaycana verdiyi vədə əməl etmir. Bu ilin birinci rübündə satın alınmalı olan peyvəndlər hələ yola salınmayıb. Azərbaycan pandemiya ilə mübarizədə ön sıradadır. Pandemiya dövründə 30 ölkəyə humanitar dəstək verib. Ümumdünya Səhiyyə Təşkilatına 10 milyon ABŞ dolları ianə edib. Azərbaycan Prezidenti İlham Əliyevin çağırışı ilə Birləşmiş Millətlər Təşkilatının koronavirusla mübarizə üzrə sammiti keçirilib. Ölkə başçısı bütün çıxışlarında peyvənd bölgüsündə haqsızlığa xüsusi diqqət çəkib".

Məşhur Məmmədovun fikrincə, COVAX-ın vədinə əməl etməməsi ona olan inamı azaldır:

"Qurumun qeyri-ədalətli olması qənaətinə gəlinir. Ölkələr arasına ayrı-seçkilik salmaq həm demokratiya, həm də humanizm qaydalarına ziddir. Bir ölkəni virusdan qoruyub digər ölkəni gözləmə mövqeyində saxlayanlar unutmasın ki, hər ölkə təhlükəsiz olmadıqca heç kim təhlükəsiz olmayacaq".

Tural Turan