Bu, jurnalistlərin rifahını yaxşılaşdıracaq - Baş redaktor

“Medianın İnkişafı Agentliyi tərəfindən həm çap, həm də onlayn mediaya maliyyə yardımının göstərilməsi ilə bağlı elan edilən son müsabiqələr qəzetlər və saytlar üçün yeni imkan, fürsət deməkdir. Media sahəsində aparılan islahatların tərkib hissəsi olan yeni yanaşmaların ortaya qoyulması dövlət tərəfindən maliyyə yardımı alan media orqanlarının əhatə dairəsinin genişlənməsinə şərait yaradacaq”.

Bunu Publika.az-a açıqlamasında “Həftə içi” qəzetinin baş redaktoru Sevinc Seyidova deyib. Baş redaktor bildirib ki, çap mediası ilə bağlı dəyişikliklərə gəldikdə isə, qəzetlərlə yanaşı, onların veb-səhifələrinə də maliyyə dəstəyinin göstərilməsinin nəzərdə tutulması yenilikdir:

“Bu qərar qəzetlərin internet səhifələrinin daha da inkişaf etdirilməsi, yenidən qurulması, texniki imkanlarının genişləndirilməsi istiqamətində mühüm rol oynayacaq. Eyni zamanda, son illərdə çap mediasının yayımı ilə bağlı yaranan çətinliklərin nəzərə alınaraq tiraj və yayımla bağlı əvvəlki tələblərin yumşaldılmasını da alqışlayıram. Qəzetlər arasında rəqabət mühitini artırmaq, oxucu kütləsi toplamaqla iqtisadi dayanıqlıqlarını təşkil etmək üçün müxtəlif bonuslar da nəzərdə tutulur. Sənədlərin qəbulu prosesinin elektronlaşdırılması, qaydaların daha da asanlaşdırılması əlavə vaxt itkisi amilini də aradan qaldırır”.

Sevinc Seyidovanın fikrincə, həmçinin, jurnalistlərin əməkhaqları ilə bağlı əksini tapan müddəalar yaradıcı heyətin sosial-iqtisadi rifah halının daha da yaxşılaşdırılmasına təkan verəcək:

“Onlayn media ilə bağlı tələblərə gəldikdə isə, bu təcrübə ölkəmizdə ilkdir. Lakin qaydalarla tanış olduqda maksimum mütərəqqi yanaşmanın ortaya qoyulduğunun şahidi oluruq. Özünü təsdiqləmək, daha da inkişaf etmək istəyən hər bir onlayn media təmsilçisi mövcud şərtlər daxilində müsabiqəyə qatıla bilər. İnanıram ki, media təmsilçiləri olaraq bundan sonra da Medianın İnkişafı Agentliyi tərəfindən KİV-lərin inkişafına, iqtisadi müstəqilliklərinin artırılmasına, jurnalistlərin sosial rifah səviyyəsinin yüksəldilməsinə hesablanan addımların, layihələrin şahidi olacağıq. Qarşıdakı müsabiqələrə qatılacaq bütün həmkarlarımıza isə uğurlar diləyirəm”.

Tural Turan