Paşinyan buna görə qalib gəldi - Nəsib Məhəməliyev

“Ermənistanda keçirilmiş seçkilərdə Paşinyan 54% səs çoxluğunu qazanmaqla öz qələbəsini təmin etmiş oldu. Seçkiyə qədər aparılan sorğulara görə, Paşinyanın təkbaşına hökumət qura bilməyəcəyi proqnozlaşdırılsa da, bunun əksi baş verdi. Hesab edirəm ki, erməni xalqının müharibədə ağır məğlubiyyətə uğramış Paşinyanı dəstəkləməsinin əsas səbəbi cinayətkar “Qarabağ klanı”na nifrətinin nəticəsidir”.

Bunu Publika.az-a açıqlamasında Milli Məclisin deputatı Nəsib Məhəməliyev deyib. Millət vəkili bildirib ki, digər tərəfdən, Azərbaycan Prezidenti İlham Əliyevin apardığı uzaqgörən, uğurlu siyasətin nəticəsidir:

“Ən bariz nümunə olaraq, bu yaxınlarda iki dövlət başçısı tərəfindən imzalanmış Şuşa Bəyannaməsini qeyd etmək istərdim. Robert Koçaryan və Nikol Paşinyanın siyasi opponentlərinin tam əksəriyyəti seçkiqabağı təbliğatını müharibə çağırışları, revanşizm üzərində qurmuşdu. 44 günlük müharibədə Azərbaycan Ordusunun gücünü görən ermənilər Şuşa Bəyannaməsinin imzalanmasından sonra gələcəklərinin ciddi təhlükə altında olduğunu dərk etdilər. Ona görə də qeyri-peşəkar, dərin savadı olmayan populist Paşinyanın qələbəsində Şuşa Bəyannaməsinin rolu danılmazdır”.

Nəsib Məhəməliyevin fikrincə, Nikol Paşinyan hökuməti təkbaşına formalaşdıracaq:

“Onun seçilməsinin bölgə üçün nələr vəd etdiyinə gəkdikdə, düşünürəm ki, 10 noyabr üçtərəfli razılaşmasının bütün bəndləri icra olunacaq. Kommunikasiyalar açılacaq, Türkiyə ilə iqtisadi əməkdaşlığa başlanılacaq. Qarabağda müharibədən sonra məskunlaşmış erməni silahlılarının çıxarılması, hələlik, Paşinyandan daha çox, ora nəzarət edən üçüncü qüvvələrin səlahiyyətindədir. Əgər Paşinyan Ermənistanda siyasi hakimiyyətini möhkəmlətsə və seçkiqabağı vədlərini icra edə bilsə, gələcəkdə bu problem həll olunar. İndiki halda ən aktual məsələ sərhədlərin delimitasiya və demarkasiya proseslərinin həyata keçirilməsi, sülh müqaviləsinin imzalanmasıdır”.

Tural Turan