Vaşinqtonda təxribat: Həmin qüvvələr Azərbaycana qarşı sistemli fəaliyyət göstərir

Xəbər verdiyimiz kimi, ötən gün Vaşinqtonda bir neçə anti-milli ünsür Prezident İlham Əliyevin qaldığı hotelin qarşısında təxribata cəhd edib. Onlar aqressiv və təhrikedici formada dövlət başçısının qaldığı hotelə daxil olmaq istəyib. Onlar kifayət qədər qeyri-etik davranışları ilə diqqəti cəlb edərək və öz mənəviyyatlarına uyğun ifadələr işlədərək təhlükəsizlik kordonunu yarmağa və zorla hotelə daxil olmağa cəhd göstəriblər.

Bu ünsürlər həm də böyük beynəlxalq tədbirin keçirildiyi gün Vaşinqtonda ABŞ-ın təhlükəsizlik qaydalarını kobud şəkildə pozublar. Onların təxribat cəhdlərinin qarşısı ABŞ polisi və Prezidentin təhlükəsizlik xidməti tərəfindən alınıb.

Məsələ ilə bağlı Publika.az-a danışan siyasi elmlər üzrə fəlsəfə doktoru Zaur Məmmədov bildirdi ki, bu təxribatçı qruplar uzun müddətdir Azərbaycana qarşı fəaliyyət göstərirlər.

“Son zamanlar bəlli xarici qüvvələr tərəfindən ciddi şəkildə təxribat xarakterli adımlar atılmaqdadır. Bundan əvvəl biz Brüsseldə Hüseynov qardaşlarının provokasiyasını gördük. Bu dəfə isə ABŞ-da onlar Amerikanın qanunvericiliyini kobud şəkildə pozaraq, təhlükəsizlik sərhədini keçərək, dövlət rəhbərliyinə qarşı bu addımı atdılar.

Azərbaycan Prezidentinin təhlükəsizlik xidmətinin əməkdaşları və Vaşinqton polisinin gördüyü işlər nəticəsində həmin şəxslər təxribatlarının cavabını aldılar. Bu addımlar həm də onu göstərir ki, mövcud situasiyada, xaricdəki bəzi qüvvələr Azərbaycana qarşı ayrı-ayrı yox, sistemli şəkildə fəaliyyət göstərirlər. Bu, təəssüf doğurur, çünki həmin “alət” libasında məhz azərbaycanlılar çıxış edirlər. Onlar bilərəkdən şüurlu şəkildə Azərbaycan dövlətinə qarşı çıxaraq cinayət törədirlər”, - deyə o qeyd etdi.

Roza