Naxçıvana hücumun izahı yoxdur: Azərbaycan və Türkiyə qisas alacaq

"Naxçıvana hücumu şiddətlə qınayırıq. Bu, Azərbaycanın ərazi hüququnun pozulmasıdır".

Bunu Publika.az-a açıqlamasında Türkiyənin Azərbaycandakı sabiq səfiri, “İMZA” İctimai Birliyinin Türkiyədəki nümayəndəsi Hulusi Kılıç deyib.

Onun sözlərinə görə, davam edən gərginliyin həll olunması üçün artıq diplomatiyaya şans verilməlidir:

“İran rəsmilərinin Türkiyəyə atılan raketlə bağlı izahatını etibarlı hesab etdik. Lakin bu gün Naxçıvan Hava Limanına edilən hücumun izahı yoxdur. İran həm Türkiyənin, həm də Azərbaycanın qonşusudur. İranda təxminən 35-40 milyon Azərbaycan türkü yaşayır. Bu səbəbdən İranda baş verənləri narahatlıqla izləyirik. Bu müharibə gündən-günə təhlükəli ölçülərə çatır. Atəşkəsin mümkün qədər tez bağlanmasını və problemin diplomatiya yolu ilə həll olunmasını gözləyirik”.

Hulusi Kılıç vurğulayıb ki, Azərbaycan və Türkiyənin belə situasiyalarda qisas almaq hüququ var:

“Azərbaycan öz ərazisini və hava məkanını idarə etmək və vətəndaşlarına ən kiçik bir zərərin belə qarşısını almaq gücünə malikdir. İran rəsmilərinin ağıllı olması vacibdir. Əks halda, Türkiyə və Azərbaycan qisası alacaq. Heç kim Türkiyənin və Azərbaycanın gücünü sınamamalıdır. Cəhd edənlər 44 günlük Vətən Müharibəsi zamanı baş verənləri gördülər. Buna görə də, atəşkəsin mümkün qədər tez əldə edilməsi üçün nə lazımdırsa, edilməlidir.

Həmçinin İrandan Körfəz ölkələrinə atılan raketlərə də haqq qazandırmaq olmaz. Çünki bu, İranla həmsərhəd olan ölkələrin ərazi bütövlüyünün pozulmasıdır”.

Roza Şəfiyeva