Zəngilandan dünyaya mesaj: Bakı diktə edən tərəfdir, bizimlə hesablaşmayanlar…

Azərbaycan Prezidenti İlham Əliyevin Zəngilanda ilk yaşayış kompleksinin açılışı zamanı sakinlərlə söhbətində verdiyi siyasi mesajlar həm regionda, həm də beynəlxalq dairələrdə diqqətlə izlənildi. Prezident çıxışında xüsusilə bəzi Avropa siyasi mərkəzlərinin Azərbaycana münasibətdə sərgilədiyi ikili standartlara və təzyiq cəhdlərinə toxunaraq açıq şəkildə bildirdi ki, artıq Cənubi Qafqazda yeni reallıq formalaşıb və bu reallığın müəllifi Azərbaycandır.

Çıxışda əsas mesajlardan biri də o idi ki, rəsmi Bakı ilə əməkdaşlıq etmək istəyən hər bir tərəf Azərbaycanın milli maraqları və suveren mövqeyi ilə hesablaşmalıdır. Xüsusilə Fransa rəhbərliyinin və Emmanuel Makronun son dövrlər Ermənistana verdiyi açıq siyasi dəstək fonunda səslənən fikirlər Bakının narazılığını bir daha ortaya qoydu. Prezidentin mesajı həm Avropaya, həm də revanşist meyillərdən əl çəkməyən erməni siyasi dairələrinə açıq xəbərdarlıq kimi qiymətləndirildi.

Mövzu ilə bağlı Publika.az-a danışan millət vəkili, politoloq Rasim Musabəyov bildirdi ki, Azərbaycanla münasibət qurmaq istəyən qüvvələr yeni geosiyasi reallıqları qəbul etməli və rəsmi Bakı ilə yalnız qarşılıqlı hörmət əsasında davranmalıdırlar.

Kənardan verilən tövsiyələr qəbul olunmur

Onun sözlərinə görə, Azərbaycanla əməkdaşlıq etmək istəyənlər ölkəyə yuxarıdan aşağı baxmaq, şərt qoymaq və ya kənardan göstəriş vermək siyasətindən əl çəkməlidirlər:

“Əgər hansısa qüvvələr və qurumlar Azərbaycanla qarşılıqlı maraqlar əsasında tərəfdaşlıq qurmaq istəyirlərsə, buyursunlar. Amma kimlərsə Azərbaycana yuxarıdan aşağı hansısa istənilməyən tövsiyələr vermək, tələblər qoymaq istəyirlərsə, getsinlər öz işləri ilə məşğul olsunlar. Məsələ bundan ibarətdir”.

Revanşizm olsa, Dəmir Yumruq yenə xatırladılacaq

Deputat vurğuladı ki, bu mesaj təkcə Qərbdəki bəzi siyasi dairələrə deyil, eyni zamanda Ermənistana da aiddir. O qeyd etdi ki, İrəvan sülh prosesində səmimi və real addımlar atarsa, Azərbaycan da buna adekvat qarşılıq verəcək:

“Ermənistan əgər Azərbaycanla sülh istiqamətində irəliləmək istəyirsə, Azərbaycan da bu addımı atacaq. Yox, əgər revanşist qüvvələr əksini etməyə çalışsalar, onda yenə də yadlarına “Dəmir Yumruq” salınacaq”.

R.Musabəyov əlavə etdi ki, regionda yaranmış yeni geosiyasi reallıqları qəbul etməyənlər nəticə çıxarmalıdırlar.

Onun fikrincə, artıq Cənubi Qafqazda diktə edən tərəf Azərbaycandır və bölgə ilə bağlı plan quran hər kəs bunu nəzərə almağa məcburdur.

“Kimlər ki Azərbaycanla Azərbaycanın diktə etdiyi şərtlər çərçivəsində işləməyə hazırdır, onlarla iş görülə bilər. Kimlər bunu qəbul etmirsə, istəmirsə - rədd olsunlar! Vəssalam”, - deyə müsahibimiz sonda nidanı qoydu.

Müəllif: Adəm Abbaslı