WUF13 Azərbaycanın beynəlxalq nüfuzuna mühüm dvidendlər qazandırır

BMT-nin 13-cü Ümumdünya Şəhərsalma Forumunun (WUF13) Azərbaycanda keçirilməsi ölkənin şəhərsalma və urbanizasiya sahəsində artan rolunun göstəricisi kimi qiymətləndirilir. Bu tədbir həm siyasi, həm də praktiki baxımdan Azərbaycana mühüm dividendlər qazandırır.

Bu sözləri Publika.az-a açıqlamasında politoloq Oqtay Qasımov bildirdi.

Onun sözlərinə görə, xüsusilə işğaldan azad olunmuş ərazilərdə həyata keçirilən “Ağıllı kənd” layihələri, yaşıl və bərpa olunan enerji istifadəsi, eləcə də planlı şəhərsalma prosesləri bu kimi beynəlxalq forumların gündəliyində yer alan əsas mövzulardandır:

“Birləşmiş Millətlər Təşkilatının 13-cü Ümumdünya Şəhərsalma Forumunun Azərbaycanda keçirilməsi olduqca əhəmiyyətlidir. Bu, ölkəmizdə, xüsusilə işğaldan azad olunmuş ərazilərdə “Ağıllı kənd” layihəsinin həyata keçirilməsi, yaşıl enerjidən və bərpa olunan enerjidən istifadə olunması, tikintinin planlı şəkildə aparılması və digər urbanizasiya məsələlərinin müzakirəsi baxımından vacibdir”.

WUF13 BMT-nin şəhər inkişafı üzrə ən böyük qlobal platformalarından biridir və forum çərçivəsində şəhərlərin planlaşdırılması, dayanıqlı inkişaf, ekoloji balans və urbanizasiya trendləri müzakirə edilir. Bakı bu il ilk dəfə Cənubi Qafqaz və Mərkəzi Asiya regionunda bu miqyaslı tədbirə ev sahibliyi edir.

Politoloq əlavə etdi ki, belə mötəbər tədbirin Azərbaycanda keçirilməsi ölkənin beynəlxalq nüfuzuna birbaşa təsir göstərir: “Azərbaycanda belə bir mötəbər tədbirin keçirilməsi ölkəmizə siyasi dividendlər qazandırır. Ümumiyyətlə, şəhərsalma və urbanizasiya məsələləri dövrümüzün ən aktual problemlərindən biridir. Çünki son yüz ildə şəhərləşmə prosesi ciddi şəkildə artıb və dünya əhalisinin böyük hissəsi şəhərlərdə yaşayır. Bu baxımdan şəhərlərin qurulması, planlaşdırılması və ekoloji standartlara uyğunluğu çox vacibdir”.

Oqtay Qasımov vurğuladı ki, WUF13 yalnız müzakirə platforması deyil, həm də ölkələr arasında təcrübə mübadiləsi üçün mühüm imkan yaradır: “Bu tədbirin Azərbaycanda keçirilməsi ölkəmizin beynəlxalq nüfuzunun və imicinin artmasına kömək edir, eyni zamanda Azərbaycanın təcrübə qazanması, təcrübə bölüşməsi və yeni biliklər əldə etməsi baxımından da vacib platformadır”.

Müəllif: Adəm Abbaslı