Səfirlik Rusiyadakı piketlə bağlı məlumat yaydı

Cari ilin 21 iyun tarixində Azərbaycan Respublikasının Rusiya Federasiyasındakı Səfirliyinin inzibati binasının qarşısında Rusiya Federasiyasının iki nəfər azərbaycanlı vətəndaşı Rövşən Əliyev və Tural Mehdiyev piket keçiriblər.

Səfirlikdən Publika.az-a verilən məlumata görə, piketin keçirilməsində məqsəd Rusiya-Azərbaycan sərhədində baş vermiş məlum insidentlə bağlı öz mövqelərini bildirmək olub. Piket iştirakçıları Səfirliyin binasına dəvət olunmuş və Səfirliyin müşaviri Cavid Nəbiyev onlarla görüşüb.

Söhbət əsnasında məlum olub ki, adları qeyd edilən şəxslərin yaşanmış hadisə, ümumiyyətlə sərhəddə toplaşan insanların Azərbaycana qaytarılması prosesi, həmçinin Səfirlik, Azərbaycan Respublikasının Xarici və Daxili işlər nazirlikləri tərəfindən bu istiqamətdə görülmüş işlər haqqında yetərincə məlumatları yoxdur.

Səfirliyin nümayəndəsi bildirmişdir ki, baş vermiş xoşagəlməz olayla bağlı Azərbaycan tərəfi təəssüfünü ifadə etmiş və bu məsələni diqqət mərkəzində saxlayır. Hal-hazırda Azərbaycanın səlahiyyətli nümayəndələri Dağıstandadırlar və yerli hakimiyyətlə bir yerdə orda toplaşan vətəndaşların tez bir zamanda ölkəyə qaytarılması üçün zəruri addımlar atmaqdadırlar. Bildirilmişdir ki, Azərbaycan Respublikasının Xarici İşlər Nazirliyin sözçüsü Leyla xanım Abdullayevanın və Səfir Polad Bülbüloğlunun Rusiyadakı Azərbaycan vətəndaşlarına bütün mümkün olan vasitələrlə, o cümlədən Rusiya və Azərbaycan televiziya kanalları, saytları, diaspor təşkilatlarının vasitəsi ilə çoxsaylı müraciətləri olmuşdur. Müraciətlərdə Rusiya-Azərbaycan sərhədinə getməməyə, orada toplaşmamağa dair çağırışlar edilmişdir. Buna baxmayaraq vətəndaşlarımızın bir qismi edilən çağırışlara məhəl qoymamış və sərhədə getmişlər. Bununla da yerli və Azərbaycan hökuməti və ilk növbədə özləri üçün əlavə problemlər yaratmışlar. Onlar indi də ora getməkdə davam edirlər. Problemin bir tərəfi də ondan ibarətdir ki, hər həftə 100-130 nəfər buraxılır, onların yerinə isə sərhədə yeniləri gəlirlər. Bununla da problem daha da ciddiləşir və ağırlaşır. Hamıya bir daha bildirmək istəyirik ki, qəbul edilmiş qərara əsasən Azərbaycan sərhədləri 01 avqust tarixinədək bağlı qalacaqdır.

Səfirlik və bütün əməkdaşları öz səlahiyyətləri çərçivəsində nə mümkündürsə edirlər. Səfir Polad Bülbüloğlu Rusiyanın Xarici işlər nazirliyinin müvafiq departamenti, Dağıstan Respublikasının rəhbərləri, Məhərrəmkənd və Dərbənd rayonlarının icra başçiları, yerli diaspor fəalları ilə daim təmasdadır.

Vurğulanmışdır ki, bu gün Dağıstanda yeni növ koronavirusla bağlı vəziyyətin ağır olmasına baxmayaraq, Dağıstan rəsmiləri və əhalisi orada toplaşan vətəndaşlarımıza öz köməkliyini əsirgəmirlər. İki aydan artıqdır ki, onlara yardım edirlər. Bununla belə dövlət rəsmilərinə, yerli polislərə daş atmaq, onlara məxsus nəqliyyat vasitələrinə ziyan vurmaq ən azı naşükürlükdür və bütün edilən yaxşılıqları dəyərsizləşdirir. Təbii ki, dövlət qurumu olaraq biz inanmırıq ki, Azərbaycan vətəndaşları onlara yardım əli uzadanlara daş atsın. Əminik ki, bu insident sərhəddə olan vətəndaşlarımızı qeyri-qanuni addım atmağa sövq etmək üçün məqsədyönlü şəkildə təşkil olunmuş təxribatdır.

Piket iştirakçıları Səfirlik tərəfindən qəbul edildiklərinə və onlara ətraflı məlumat verildiyinə görə təşəkkürlərini bildirmiş və sərhəddə toplaşmış Azərbaycan vətəndaşlarının çox tez bir zamanda vətənə qaytarılacaqlarına ümid etdiklərini söyləmişdirlər.