Millət vəkilindən həmkarına SƏRT SÖZLƏR

Həqiqətən də bu məsələnin müzakirə edilməsinə, aydınlıq gətirilməsinə ehtiyac var idi. Bəzən çoxları düşünürdü ki, Prezidentin xüsusi nümayəndəsi idarəetmədə paralel dövlət strukturu olacaq.

Publika.az xəbər verir ki, bunu deputat Aydın Mirzəzadə parlamentdə çıxışı zamanı deyib.

O əlavə edib ki, Prezidentin xüsusi nümayəndəsi ilə icra hakimiyyəti orqanları paralel struktur kimi qiymətləndirilməməlidir: “Əvvəla nəzərə almaq lazımdır ki, Prezidentin xüsusi nümayəndələri işğaldan azad olunan ərazilərlə əlaqəlidir. Nəzərə almaq lazımdır ki, azad edilən tarixi torpaqlarımızda işlər sıfırdan başlayacaq. Orada müxtəlif nazirliklər, idarələr, şirkətlər çalışacaq. Xüsusi nümayəndə bu qurumların fəaliyyətini koordinasiya edəcək, quruculuq, abadlıq işlərini əlaqələndirəcək, Prezidentdən aldığı tapşırıqları həyata keçirəcək. Yerli icra qurumları isə əsasən əhalinin problemləri ilə məşğul olacaq”.

Aydın Mirzəzadə həmkarı Razi Nurullayevi tənqid edib: “Razi Nurullayevin çıxışı klassik müxalifətçilikdən kənara çıxmadı. Hamı pisdir, bunu dəyişdirmək lazımdır prinsipini ortaya qoydu. Amma hər hansı model, xarici təcrübə haqda danışmadı. Bu gün xarici təcrübə Azərbaycandan öyrənir. Azərbaycanın ordu quruculuğunu, köçkünlərlə iş təcrübəsini və idarəetmədə təkmilləşdirməni öyrənir”.