Nida Xəbər

Polad Həşimovun xatirəsinə həsr olunmuş ağacəkmə aksiyası baş tutdu - FOTO

13 İyul 2021 18:25

Vətən Müharibəsi Əlillərinə Kömək İctimai Birliyi və Bakı Şəhər İcra Hakimiyyətinin birgə təşkilatçılığı ilə Milli Qəhrəman general-mayor Polad Həşimovun xatirəsinə həsr olunmuş ağacəkmə aksiyası həyata keçirilib.

Publika.az xəbər verir ki, aksiyadan öncə şəhid generalın anası Səmayə xanım başda olmaqla Birliyin idarə heyəti və fəal üzvləri, ictimaiyyət nümayəndələri Fəxri Xiyabana gedərək Polad Həşimovun abidəsi önünə gül çələngi qoyub, ruhuna dualar oxuyublar.

Sonra aksiya iştirakçıları Xətai rayonunda Polad Həşimov prospektində ağacəkmə aksiyasında iştirak ediblər.

Aksiyası ilə bağlı Vətən Müharibəsi Əlillərinə Kömək İctimai Birliyinin icraçı direktoru Zamin Zeynal mətbuata açıqlamasında bildirib ki, torpaqlarımızın azadlığı uğrunda gedən döyüşlərdə qəhrəmancasına savaşaraq müqəddəs şəhidlik zirvəsinə ucalmış, 44 günlük Vətən müharibəsinin təməl daşı, Azərbaycan gəncliyin örnək nümunəsi, hərb tariximizin ləyaqətli simalarından biri, öz məğrurluğu, hünəri ilə Azərbaycan tarixinə əbədi yazılan general-mayor Polad Həşimovun anım günündə belə bir ağacəkmə aksiyasını keçirilməsini özlərinə vətəndaşlıq, soydaşlıq borcu hesab edirlər.

Z.Zeynal qeyd edib ki, bu kimi ictimai, mədəni əhəmiyyətli tədbirləri gerçəkləşdirməkdə əsas məqsəd Ali Baş Komandan İlham Əliyevin Milli Qəhrəmanlara və onların ailə üzvlərinə diqqət və qayğı yönümündə dövlət tərəfindən görülən uğurlu işlərə vətəndaş cəmiyyəti töhvəsini verməkdir.

Qurum rəsmisi Birlik tərəfindən gələcəkdə də ictimai, siyasi, mədəni, kütləvi, mənəvi dəstək ruhlu, tədbir və layihələrin davam etdiriləcəyini vurğulayıb.