Azərbaycanla Ermənistan barışır: Rusiya öz adına çıxır

Rusiya baş nazirinin müavini Aleksey Overçuk jurnalistlərə açıqlamasında bildirib ki, Azərbaycan və Gürcüstan ərazisindən Rusiya ilə Ermənistan arasında dəmir yolu xəttinin açılması Cənubi Qafqazda sülhə real töhfə verib.

Publika.az xəbər verir ki, Overçukun sözlərini TASS sitat gətirib.

Bundan əvvəl yeni nəqliyyat marşrutu ilə ilk dəfə olaraq Rusiyadan buğda partiyası Ermənistana çatdırılıb. "Biz Rusiya Federasiyası ilə Ermənistan Respublikası arasında Azərbaycan Respublikası və Gürcüstan ərazisindən keçən dəmir yolu əlaqəsinin başlanmasını alqışlayırıq", - Baş nazirin müavini bildirib.

O qeyd edib ki, Ermənistan müstəqillik əldə etdikdən sonra ilk dəfədir ki, iki ölkə arasında birbaşa dəmir yolu əlaqəsi yaradılır. Overçukun sözlərinə görə, bu hadisə “Cənubi Qafqazda sülhün bərqərar olmasına real, nəzərəçarpacaq töhfədir” və eyni zamanda Rusiyanın regiondakı bütün dövlətlər üçün regional sabitliyin və iqtisadi inkişafın təşviqi üzrə səylərini nümayiş etdirir.

Overçuk vurğulayıb ki, yeni marşrut Rusiyanın region ölkələri ilə nəqliyyat əlaqələrini gücləndirir, Avrasiya İqtisadi Birliyinin digər üzv ölkələrinin malları üçün Ermənistan bazarlarına çıxış imkanlarını artırır və erməni istehsalçıları üçün ittifaq bazarlarına çıxış imkanlarını artırır.

“Bu yolda gedən ilk yükün - Rusiya taxılının həyat və yaradıcılığın ən mühüm simvollarından biri olması rəmzidir ki, bu da Cənubi Qafqazda sülhün bərqərar olması və qarşıdurmadan əməkdaşlığa keçmək istəyini bir daha vurğulayır”, - Overçuk əlavə edib.

Onun sözlərinə görə, yeni dəmir yolu xəttinin açılışı Rusiya, Ermənistan və Azərbaycan liderlərinin 2020 və 2021-ci illərdə əldə etdiyi razılaşmaların, habelə üç ölkənin baş nazir müavinlərinin həmsədrlik etdiyi üçtərəfli işçi qrupunun səylərinin nəticəsi olub. “Mən həmkarlarıma – Azərbaycan Respublikası Baş nazirinin müavini Şahin Mustafayevə və Ermənistan Respublikası Baş nazirinin müavini Mher Qriqoryana Cənubi Qafqaz regionunda nəqliyyat əlaqələrinin qurulmasında göstərdikləri birgə səylərə, habelə Gürcüstana bu marşrut üzrə daşımaların təşkilində konstruktiv iştirakına görə təşəkkür etmək istərdim”, - deyə baş nazirin müavini yekunlaşdırıb.

Tural