Ermənistan prezidenti Azərbaycanla sərhəddə bəyan etdi: Sülh o vaxt olacaq ki...

Ermənistan Respublikasının Prezidenti Vaaqn Xaçaturyan hesab edir ki, Ermənistan və Azərbaycan arasında yekun sülhə nail olmaq üçün iki ölkə və xalqlar arasında qarşılıqlı etimad mühitinin yaradılması çox vacibdir.

Publika.az “Armenpress”ə istinadla xəbər verir ki, Xaçaturyan bu fikri Tavuş vilayətinin Kirants kəndində jurnalistlərə müsahibəsində “iki ölkə arasında sülh prosesinin dönməz olması üçün Ermənistan və Azərbaycanın hansı mərhələdə olması” ilə bağlı sualı cavablandırarkən bildirib.

"Sülh o zaman gələcək ki, iki ölkə və xalq arasında qarşılıqlı etimad bərpa olunsun: bu, zaman məsələsidir. Biz siyasi liderlər olaraq buna nail olmaq üçün həqiqətən siyasi prosesi və hüquqi bazanı təmin etməliyik", - Vaaqn Xaçaturyan qeyd edib.

Onun sözlərinə görə, hər iki ölkə bir-birinin ərazi bütövlüyünü və suverenliyini tanıdığından, ikitərəfli hüquqi proses artıq qurulub və bu prosesin yekun başa çatması iki ölkənin vətəndaşları və xalqlarının öz daxilində mövcud olan çətinlikləri dəf edə bildiyi an olacaq.

"Bunun nə vaxt baş verəcəyini heç kim deyə bilməz. Təbii ki, biz bunun mümkün qədər tez baş verməsini istərdik, lakin hər iki ölkənin hakimiyyəti sadəcə olaraq əlverişli şərait, mümkün qədər çox əlaqə imkanları yaratmalı və bir ölkədə narazı insanların ola biləcəyindən qorxmamalıdır. Etiraf edirəm ki, bunun reallığa çevrilməsi ehtimalı yüksəkdir", - Ermənistan prezidenti vurğulayıb.

Xaçaturyanın sözlərinə görə, bu gün qlobal səviyyədə mövcud olan problemlər bütün ölkələr üçün eynidir və bu problemlərin həlli birgə səylər tələb edir.

"Bu, iqlimə, sülhə, dünyada baş verən texnoloji dəyişikliklərə, süni intellektə və s. aid ola bilər. Bütün bunlar kollektiv fəaliyyət tələb edir. Bunu hamı qəbul edir və burada özümüzü təcrid etmək mümkün deyil və bu məsələdə qonşularımızla işləmək daha asan və səmərəli olmalıdır", - Ermənistan prezidenti vurğulayıb.

Ermənistan prezidenti Vaaqn Xaçaturyan noyabrın 19-dan 20-dək Gürcüstanda rəsmi səfərdə olub. O, Tbilisidə Gürcüstan prezidenti Mixail Kavelaşvili, parlamentin sədri Şalva Papuaşvili və baş nazir İrakli Kobaxidze ilə görüşüb. Gürcüstandan qayıdan Xaçaturyan Azərbaycanla sərhəd olan Tavuş vilayətinin Kirants kəndində dayanıb, burada işlərin gedişi ilə tanış olub və yerli sakinlərlə söhbət edib.

Tural