Ərdoğanın baş müşaviri: Əhməd Cavad sağ olsaydı, İlham Əliyevə...

Qarabağ ikinci Çanaqqaladır.

Publika.az xəbər verir ki, bunu Türkiyə Prezidentinin Baş müşaviri Yalçın Topçu deyib.

Azərbaycanın Dağlıq Qarabağ və ətraf ərazilərini azad etmək uğrunda apardığı müharibədəki zəfəri haqqında danışan Y.Topçu bildirib ki, işğalçılara qarşı belə sülh əli uzadılıb: “Şəhid atamız Əhməd Cavad bu gün sağ olsaydı, “Bismillah” şeirinin bənzərini Qarabağı işğaldan azad edən Can Azərbaycanın Müzəffər Ordusuna və ata vəsiyyətini yerinə yetirən xeyirli övlad Ali Baş Komandan cənab İlham Əliyev üçün də yazardı. Azərbaycanın bu zəfərini insanlıq tarixi “Bəşəri Zəfər” kimi yazacaq. Çünki Azərbaycan beynəlxalq hüquqa, mülki insan haqlarına və təbiətə müharibə hüquqları və şərtləri çərçivəsində barmaq dişləyəcək dərəcədə riayət edib, üstün ikən belə məğlub təcavüzçüyə sülh əlini uzadıb”.

Yalçın Topçu sözlərinə belə davam edib: “Qarabağ Qafqazın və böyük Türk-İslam millətinin ikinci Çanaqqalasıdır. 1915-ci ildə Çanaqqalada dastan yazanların əkiz qardaşı olan Azərbaycan xalqı 1918-ci il və Qara Yanvarda Bakıda, indi isə 8 noyabrda Şuşada yazıblar. Öz torpaqları olan Qarabağı hücumçu Ermənistanın 30 illik zalım, alçaq işğalından azad ediblər. Azərbaycanın bu zəfəri, eyni zamanda, 28 ildir Ermənistana verdikləri qərarı tətbiq etdirə bilməyən BMT-nin də yara alan prestijinə dərman olacaq. Bu zəfər ilə 100 ildir verdiyimiz şəhidlərin ruhu şad oldu. Bölgə və dünya xalqları əmin olsun ki, Azərbaycanın bu Bəşəri Zəfəri bölgəyə sülh və rifah gətirəcək”.

Zümrüd