Vanetsyan Şuşadakı döyüşlərdən necə qaçıb? - Karamyan ŞOK DETALLARI açdı

Düşmən ölkə Ermənistanla yanaşı, bütün hərb dünyasını təəccüb və vahimə içində qoyan Şuşa döyüşləri müharibənin bitməsindən 2 aydan çox zaman keçməsinə baxmayaraq, hələ də davam edən qızğın müzakirələrə və fərziyyələrə səbəb olub.

Publika.az xəbər verir ki, Ermənistan Milli Təhlükəsizlik Xidmətinin keçmiş direktoru Arqişti Karamyan müharibə zamanı Şuşa yaxınlığında gedən döyüşlərdən və sələflərindən biri, Vətən partiyasının lideri Artur Vanetsyanın “döyüş əməliyyatlarından” danışıb.

“İctimai Televiziya”ya verdiyi müsahibədə Karamyan Şuşa yaxınlığında vəziyyətin pisləşməsindən sonra keçmiş müdafiə naziri Seyran Ohanyanın rəhbərlik etdiyi qərargahın yaradıldığını söyləyib. Azərbaycan Ordusunun Şuşaya hücumu günü Karamyan, Ohanyan və separatçıların ordusunun komandanlığından olan hərbçilər qərargahda olub. Karamyanın sözlərinə görə, Vanetsyan dəstəsi ilə oraya gəlib. Əvvəlcə Ağdərəyə getməli olduğunu söyləyib, lakin komandanlıq onun Şuşada lazım olduğuna qərar verib.

Vanetsyan və dəstəsi şəhərin binalarından birinə yerləşdirilib. Gecə Azərbaycan Ordusunun hücumu başlayıb. Komandanlıq Vanetsyanla əlaqə qurub və xətlərdən birini tutmağı əmr edib. Ancaq Vanetsyan yeni gəldiklərini və döyüşə qatılmağa hələ hazır olmadıqlarını deyib. Bir neçə saat keçib, bundan sonra Ohanyan Karamyanın Vanetsyanın yanına getməsini və ona müdafiə bölgələrindən birində yerləşməsini əmr edib. Karamyan Vanetsyanla görüşüb, vəziyyət haqqında danışıb. Onlar birlikdə qərargaha gedib. Onlara tapşırıq verilib, bundan sonra Karamyan Vanetsyanı dəstəsinin olduğu yerə qədər müşayiət edib.

Lakin sonradan Vanetsyanın dəstəsinin obyektiv və subyektiv səbəblərdən idarə olunmadığı məlum olub. Bundan sonra dəstəyə bir polkovnik başçılıq edib və Karamyan onunla birlikdə Vanetsyanın dəstəsindən 10 nəfərin seçilməsinə və onlarla birlikdə müdafiə üçün ən yaxın hündürlüyü tutmalı olduğuna qərar verib. Yolda Karamyan müdafiə üçün əlverişli yüksəklik görüb və oraya yerləşmək üçün daha çox əsgər götürməyə qayıdıb. Geri qayıdanda Vanetsyanın qərargahda olduğu və bir neçə saat əvvəl Xankəndiyə getdiyi məlum olub. Daha sonra Karamyan Vanetsyanın dəstəsindən yalnız 20 nəfərinin Şuşadakı məntəqədə qaldığını öyrənib və bir neçə saat sonra onların da əraziləri tərk etdikləri məlum olub.

Zümrüd