Novruz tonqalının Şuşada yandırılması tarixi ədalətin bərpasıdır - Deputat

"Ölkə başçısı tərəfindən builki Novruz tonqalının məhz Şuşada yandırılması tarixi ədalətin bərpa edilməsidir. Cənab Prezidentimiz, Ali Baş Komandan İlham Əliyevin Şuşada bayram tonqalı ətrafında Azərbaycan xalqının Novruz bayramını təbrik etməsi hər bir azərbaycanlını qürurlandırır. Ölkə başçısı Cıdır düzündən Azərbaycan xalqına müraciətində söylədi ki, Şuşa dağıntılara məruz qaldı, buradakı tarixi abidələrimiz mənfur düşmənlərimiz tərəfindən dağıdıldı. Ancaq Şuşa əyilmədi, sınmadı, öz ləyaqətini qorudu".

Bunu Publika.az-a açıqlamasında Milli Məclisin deputatı Vüqar İskəndərov ölkə başçısı İlham Əliyevin öz ailəsi ilə birgə builki Novruz bayramı tonqalını Şuşada qalamasından və tonqal ətrafında Azərbaycan xalqına etdiyi müraciətində səsləndirdiyi fikirlərdən danışarkən deyib. Millət vəkili bildirib ki, bu ləyaqəti şərəflə, iftixarla qoruyan Şuşa, Azərbaycan xalqı builki bayramı sevinclə qeyd edir:

"Uzun illər bir-birimizə təbriklərimizdə, fikirlərimizdə, alqışlarımızda bir fikri söyləyərdik. Deyərdik ki, gün o gün olsun ki, növbəti bayramı Şuşada, Cıdır düzündə, eləcə də işğal altındakı digər ərazilərimizdə qeyd edək. Biz artıq öz torpaqlarımıza qovuşduq. Bu tarixi hadisə hər bir azərbaycanlının qəlbində sevinclə, iftixarla daima yadda qalacaq. Şuşa həm də Azərbaycanın milli ruhunu qoruyan şəhər kimi xüsusi əhəmiyyətə malikdir. 28 il işğal altında qalan Şuşadan Azərbaycan xalqının irsini silmək mümkün olmadı. Dağıntılara məruz qalsa da, yenidən özümüzə, öz sahibinə qayıtdı. Bu, asan başa gəlmədi, müzəffər Ali Baş Komandanımızın uzaqgörən siyasəti nəticəsində buna nail olduq".

Tural Turan