Prezidentin bu addımı rəmzi xarakter daşıyır - RƏY

“Ölkə başçısının Zəngilanda yeni inşa olunan məscidin təməl daşını qoyması rəmzi xarakter daşıyır. Biz böyük qayıdışa öz milli-mənəvi dəyərlərimizin bərpası ilə başlayırıq”.

Bunu Publika.az-a açıqlamasında Azərbaycan Demokratik İslahatlar Partiyasının (ADİP) sədri, Milli Məclisin deputatı Asim Mollazadə deyib. Deputat bildirib ki, ölkə başçısının Cəbrayıl və Zəngilana səfərləri zamanı yeni layihələr təqdim olundu:

“ “Ağıllı kənd”, yeni, müasir aqro komplekslər və ən əsası, Zəngəzur dəhlizinin yollarının işa olunması böyük hadisədir. Düşünürəm ki, həm infrastrukturun bərpası, həm də yeni iş yerlərinin açılması üçün müasir aqro fermaların inşası istiqamətində görülən işlər gələcəkdə Qarabağı dünyanın ən gözəl bölgəsinə çevirəcək”.

ADİP sədri vurğulayıb ki, bu istiqamətdəki bütün planlar sistemli xarakter daşıyır:

“Bu istiqamətdə Azərbaycanla birgə işləyən tərəfdaş ölkələr də mövcud prosesdə ölkəmizə öz dəstəyini verəcək. Prezidentin Zəngilana, Cəbrayıla hər zaman diqqət yetirməyi “Böyük qayıdış” planının Azərbaycan üçün nə qədər önəmli olmasının göstəricisidir”.

Tural Turan