Mühafizəçiləri Putini ifşa etdi: Bütün addımları belə izlənilirmiş

Rusiya Federal Təhlükəsizlik Xidmətinin (FTX) bəzi əməkdaşları rəsmi səfərlər zamanı fitnes proqramından istifadə edib və idman fəaliyyətləri haqqında məlumat paylaşıblar. Onların istifadə etdiyi “Strava” idman proqramına əsasən Vladimir Putinin təhlükəsizliyinə cavabdeh olan FTX əməkdaşlarının hərəkətləri izlənilib.

Publika.az xəbər verir ki, bu barədə “Le Monde” nəşri yazıb.

Jurnalistlər “Strava”-da ictimai hesabları olan Putinin 6 mühafizəçisini aşkar ediblər. Onların hərəkətləri, xüsusən də peşəkar səyahət zamanı onlayn izlənilib.

Bildirilir ki, FTX əməkdaşları 2023-cü ilin sentyabrında Blaqoveşenskdə qaçışları barədə məlumat dərc ediblər. Məhz həmin dövrdə, bu şəhərdən bir qədər aralıda, Vostoçnı kosmodromunda Putin KXDR lideri Kim Çen Inla görüşüb. O zaman bu görüşün təfərrüatı ciddi şəkildə gizli saxlanılırdı.

Bundan əlavə, belə görünür ki, Putinin mühafizəçiləri 2019-cu ildən bəri Gelencikdəki sarayın yaxınlığında müntəzəm məşq edirlər. “Le Monde” yazır ki, bu, Putinin sahibliyini hər cür inkar etdiyi saraya baş çəkdiyini göstərə bilər.

Jurnalistlər onu da müəyyən edə biliblər ki, 2021-ci il avqustun 4-də FTX əməkdaşlarından biri Ladoqa gölünün sahilindəki Kareliyadakı Putinin gizli daçasının ətrafında qaçıb.

Eyni şəkildə, təkcə Putinin mühafizəçiləri ifşa olunmayıb. Nəşrin araşdırmasına görə, proqramdan Fransa prezidenti Emmanuel Makron, ABŞ prezidenti Co Bayden və digər tanınmış siyasətçilər, o cümlədən Kamala Harris və Donald Trampın təhlükəsizlik işçiləri də istifadə edib.

Akqabay