Başladı: Prezidenti prokurorluğa çağırdılar

Gürcüstan Prokurorluğu ölkə prezidenti Salome Zurabişvilini oktyabrın 26-da keçirilmiş parlament seçkilərinin saxtalaşdırılması ilə bağlı verdiyi ifadələrə görə dindirməyə çağırıb.

Publika.az xəbər verir ki, bu barədə prokurorluğun bəyanatında qeyd olunub.

“MSK-nın bəyanatına və KİV-də yayılan məlumatlara görə, Gürcüstan prezidenti Salome Zurabişvilinin əlində 2024-cü il parlament seçkilərinin mümkün saxtalaşdırılmasına dair sübutlar olmalıdır, ona görə də qanuna görə, bu il oktyabrın 31-də Gürcüstan prezidenti dindirilmək üçün istintaq orqanına dəvət olunub”, - bəyanatda deyilir.

Xatırladaq ki, oktyabrın 26-da Gürcüstanda parlament seçkiləri keçirilib. Mərkəzi Seçki Komissiyasının məlumatına görə, Rusiya ilə münasibətlərin qorunub saxlanmasının tərəfdarı olan və anti-Rusiya sanksiyalarına qarşı çıxan hakim “Gürcü arzusu” partiyası 53,93 faiz səs toplayıb.

Dörd müxalifət partiyası da cəmi 37,78% səs toplayaraq parlamentə daxil olub. Artıq müxalifət nümayəndələri MSK-nın məlumatlarını tanımadıqlarını bəyan ediblər. Onlardan 3-ü mandatlarından imtina edib.

Ölkə konstitusiyasına görə partiyasız olmağa borclu olan Zurabişvili Qərbyönlü müxalifətə qoşularaq müxalifət qüvvələrini seçkilərdən sonra etiraz aksiyaları təşkil etməyə çağırıb.

Tural