Tehranda Putini gözləyirlər: 8 milyardlıq layihə reallaşacaq?

Rusiya İranın qaz layihələrinə səkkiz milyard dollar sərmayə qoyacaq.

Publika.az “RİA Novosti”yə istinadən xəbər verir ki, bunu İranın Moskvadakı səfiri Kazım Cəlali deyib.

“İki ölkə arasındakı razılaşmalara uyğun olaraq, Rusiya İranın qaz layihələrinə səkkiz milyard dollar sərmayə qoyacaq”, - diplomat bildirib.

Onun sözlərinə görə, məbləğin bir hissəsi (təxminən beş milyard) artıq müqavilələrdə nəzərdə tutulub. Qalan müqavilələr yekun təsdiqini gözləyir.

Səfir həmçinin qeyd edib ki, Tehran yaxın vaxtlarda Rusiya prezidenti Vladimir Putinin səfərini gözləyir.

Xatırladaq ki, Rusiya ilə İran arasında hərtərəfli strateji tərəfdaşlıq haqqında saziş mayın əvvəlində İran parlamentinə göndərilib. İran Xarici İşlər Nazirliyinin rəsmi nümayəndəsi İsmail Bəqayinin sözlərinə görə, saziş onun ratifikasiyası üçün zəruri olan mərhələlərdən fəal şəkildə keçir.

Saziş 2025-ci il yanvarın 17-də İran prezidenti Məsud Pezeşkianın Moskvaya səfəri zamanı imzalanıb. Sənədə əsasən, tərəflər qarşılıqlı maraq doğuran bütün sahələrdə əlaqələri dərinləşdirməyə və genişləndirməyə, təhlükəsizlik və müdafiə sahəsində əməkdaşlığı gücləndirməyə, regional və qlobal səviyyədə fəaliyyətləri sıx əlaqələndirməyə çalışırlar ki, bu da uzunmüddətli, hərtərəfli strateji tərəfdaşlığa uyğundur.

Tural