Region

İstanbulun 6 rayonunda etiraz aksiyaları QADAĞAN EDİLDİ

7 Sentyabr 2025 22:24

İstanbul hakimiyyəti şəhərin altı rayonunda, o cümlədən mərkəzi ərazilərdə mitinq və nümayişlərin keçirilməsinə qadağa qoyub. Qərar üç sutkadan çox qüvvədə olacaq.

Publika.az xəbər verir ki, bu barədə vilayət rəhbərliyi məlumat verib.

Açıqlamada bildirilir ki, qadağa 7 sentyabr saat 20:00-dan 10 sentyabr çərşənbə günü saat 23:59-a qədər qüvvədə olacaq. Qadağa Beşiktaş, Beyoğlu, Eyüpsultan, Kağıthane, Sarıyer və Şişli rayonlarını əhatə edir.

Qadağanın səbəbi göstərilmir. Məlumata görə, Türkiyənin əsas müxalifət partiyası - Cümhuriyyət Xalq Partiyası (CHP) tərəfdarlarını bazar ertəsinə keçən gecə partiyanın İstanbul filialının binası qarşısında etiraz aksiyası keçirməyə çağırıb.

2 sentyabrda İstanbul məhkəməsi CHP-nin İstanbul şöbəsinin 2023-cü ilin payızında keçirilmiş qurultayının nəticələrini etibarsız saymaq barədə qərar çıxarıb. Ehtiyat tədbiri kimi şöbənin rəhbəri Özgür Çelik və digər rəhbər şəxslər vəzifələrindən kənarlaşdırılıblar.

Hüseyn İbadlı