Gürcü Kilsəsinin yeni rəhbəri necə seçiləcək?

Yepiskop Şio, 92 yaşında vəfat edən Bütün Gürcüstanın Katolikos-Patriarxı II İlyanın vəsiyyətnaməsinin açıqlanmasından sonra rəsmi olaraq Gürcüstan Pravoslav Kilsəsinin müvəqqəti rəhbəri vəzifəsini icra edəcək.

Publika.az “Sputnik Gürcüstan”a istinadla xəbər verir ki, bu prosedur Gürcüstan Pravoslav Kilsəsinin kanonik normaları ilə müəyyən edilib.

Bildirilir ki, yalnız rahib, yepiskop və ya metropoliten rütbəsində Gürcü Pravoslav Kilsəsinin yepiskopu, ilahiyyat təhsili və kifayət qədər kilsə təcrübəsi olan, 40 yaşdan kiçik və 70 yaşdan yuxarı olmayan etnik gürcü Bütün Gürcüstanın Katolikos-Patriarxı ola bilər.

Dəfn mərasimindən sonra Müqəddəs Sinodun iclası çağırmalıdır. Bu iclasda üç namizəd müəyyən ediləcək və sonradan genişləndirilmiş məclisə təqdim ediləcək və bu məclisdə Bütün Gürcüstanın Katolikos-Patriarxı seçiləcək.

Müqəddəs Sinodun 39 üzvünün hər birinin, o cümlədən öz namizədini irəli sürmək hüququ var.

Müqəddəs Sinod iclasında ən çox səs toplayan üç namizəd genişləndirilmiş məclisə təqdim olunacaq. Bu, Patriarxal taxt-tacın boşalmasından ən tezi 40 gün və ən geci iki ay sonra baş tutmalıdır. Genişləndirilmiş məclis, eləcə də Bütün Gürcüstanın yeni Katolikos-Patriarxının taxta çıxması Tbilisidəki Müqəddəs Üçlük Patriarxal Kafedralında keçiriləcək.

Genişləndirilmiş məclisə Müqəddəs Sinodun bütün üzvləri, iki ruhani və hər yeparxiyadan bir din xadimi daxildir. Mtsxeta-Tbilisi yeparxiyasının bütün digər yeparxiyaların birləşmiş sayı qədər nümayəndəsi var. Genişləndirilmiş məclisə həmçinin hər monastırdan, ilahiyyat akademiyasından və seminariyadan iki nümayəndə, eləcə də Gelati Akademiyasından dörd nümayəndə daxildir.

Genişləndirilmiş iclasda iştirak edən hər bir iştirakçının patriarx namizədləri ilə bağlı öz fikrini bildirmək hüququ var. Lakin yeni Katolikos-Patriarxı seçmək hüququ Müqəddəs Sinod üzvlərinə məxsusdur.

Səslərin yarısından çoxunu, yəni ən azı 20-ni toplayan namizəd seçilmiş hesab olunur.

Tural