ÜST rəsmisindən XƏBƏRDARLIQ - Koronavirusdan daha təhlükəli...

Ümumdünya Səhiyyə Təşkilatının mütəxəssisləri antibiotiklərin və antiviral dərmanların nəzarətsiz qəbulu səbəbindən yeni pandemiyanın yaranması barədə xəbərdarlıq edib. Bildirilib ki, bu, koronavirus epidemiyasından daha təhlükəli vəziyyətə səbəb olacaq.

Publika.az xəbər verir ki, bu barədə ÜST-nin Rusiyadakı nümayəndəsi Melita Vuynoviç “İzvestiya MİK”də keçirdiyi mətbuat konfransında danışıb.

“Antibiotikləri diqqətlə və həkim təyini ilə qəbul etmək lazımdır. Həkimlər də öz növbəsində antibiotiklərə ciddi ehtiyac olduğu halda xəstəyə bu dərmanı təyin etməlidir. Əks halda daha ciddi fəsadlara gətirib çıxara bilər. Bu, antibiotik və antiviral dərmana davamlı mikroorqanizmlərin bir pandemiyasıdır”, - həkim qeyd edib.

Vuynoviçə görə, hadisələrin belə inkişafı ilə yoluxucu xəstəliklərin müalicəsində ediləcək bir üsul qalmayacaq, çünki bədən antibiotiklərə artıq təsirsiz qalacaq.

“Anlamaq vacibdir ki, koronavirus həm həkimlər, həm də cəmiyyət tərəfindən yoluxucu xəstəliklərə dair fikirlərə yenidən baxmağa təkan verdi”, - ÜST təmsilçisi yekunda bildirib.

Aytən Məftun