Ürəyi 10 yaş cavanlaşdıran GEN TAPILDI

Uzunömürlülərdə qocalma əleyhinə tapılan gen ürəyin bioloji yaşını 10 il azaldır.

Publika.az xəbər verir ki, bu barədə Bristol Universiteti və İtaliyanın MultiMedica Group tibb təşkilatının alimləri məlumat verib. Tədqiqatın nəticələri "Cardiovascular Research" jurnalında dərc olunub.

Siçan modelindən istifadə edilən təcrübələr göstərib ki, uzunömürlülərdə aşkar edilən mutant genin bir dəfə vurulması orta yaşlı heyvanlarda ürək funksiyasının pisləşməsini dayandırır. Yaşlı gəmiricilərə gen daxil edildikdə, ürəyin bioloji saatı 10 insan ilinə geri çəkilib ki, bu da ürəyin fəaliyyətinin bərpası və miokard perfuziyasının yaxşılaşması ilə müşahidə olunub.

Bu, BPIFB4 geninin uzunömürlülük (LAV) ilə əlaqəli bir variantıdır, onun daşıyıcıları daha uzun ömürlüdür və ürək-damar ağırlaşmaları riski daha azdır.

Milanda "MultiMedica" qrupunun tədqiqatçıları bu geni ağır ürək xəstəliyi olan yaşlı xəstələrin ürək hüceyrələrinə yeridib və sonra onların funksiyasını sağlam ürək hüceyrələrinin funksiyası ilə müqayisə ediblər. Nəticədə, ürək çatışmazlığı olan yaşlı xəstələrdə yeni qan damarların meydana gəlməsində iştirak edən hüceyrələrin normal fəaliyyətini bərpa etdiyi üzə çıxıb.

Aytən Məftun