Sosial şəbəkələrin təhlükəli trendi: Bu “kokteyl” ürəyi dayandıra bilər

Sosial şəbəkələrdə “sərxoş olmaq” üçün yayılan korvalol və energetik qarışıq ölümcül təhlükə yarada bilər.

Publika.az xəbər verir ki, bu barədə həkim-terapevt, tibb elmləri namizədi Andrey Kondraxin xəbərdarlıq edib.

Həkimin sözlərinə görə, korvalolun tərkibində olan fenobarbital qaraciyərin ferment sistemini bloklayaraq toksinlərin orqanizmdən xaric olunmasını çətinləşdirir. Bu isə arterial təzyiqin aşağı düşməsinə və orqanizmdə oksigen çatışmazlığına səbəb ola bilər. Energetiklərdəki kofein isə bu reaksiyanı gücləndirir.

“Bu, çox sürətli dekompensasiyaya gətirib çıxara bilən zəhərlənmədir. İnsan bir daha geri qayıtmaya bilər”, - deyə mütəxəssis bildirib.

Həkimdən təhlükəli “kokteyl” xəbərdarlığı

Kondraxin qeyd edib ki, fenobarbitalı aptekdən reseptsiz almaq mümkün deyil. Korvalol və valokordin isə reseptsiz satılır. Onun sözlərinə görə, energetik içkilərin 18 yaşdan aşağı şəxslərə satışının qadağan edilməsinə baxmayaraq, sosial şəbəkələrdə belə bir trendin yaranması yeniyetmələrin bu içkiləri əldə edə bildiyini göstərir.

Həkim valokordinin xüsusilə yaşlı insanlar arasında geniş istifadə edildiyini də vurğulayıb. Onun fikrincə, preparatın reseptlə satışa keçirilməsi sosial gərginliyə səbəb ola bilər. Buna görə də yaranmış təhlükəli vəziyyətlə bağlı çıxış yolunun tapılması vacibdir.

Ürək dayanması və koma riski

Daha əvvəl yeniyetmələrin korvalol və energetikdən hazırlanan bu təhlükəli qarışığa maraq göstərdiyi bildirilmişdi. Sosial şəbəkələrdə onun hazırlanması ilə bağlı təlimatlar da yayılıb.

Nevroloq Tatyana Mozolevskaya və kardioloq Kristina Vulf belə “kokteyl”in ürəyin dayanmasına, ağır zəhərlənmə zamanı isə komaya səbəb ola biləcəyi barədə xəbərdarlıq ediblər.

Müəllif: Adəm