Damarları tıxayan təhlükə: Mütəxəssisdən xəbərdarlıq

İnsult və infarkt kimi ciddi ürək-damar problemlərinin qarşısını almaq üçün qidalanmaya, yuxu rejiminə və gündəlik vərdişlərə diqqət yetirmək vacibdir.

Publika.az xəbər verir ki, bunu amerikalı kardioloq Sirişa Vadali bildirib.

Onun sözlərinə görə, yüksək miqdarda şəkərin müntəzəm qəbulu birbaşa damarların tıxanmasına səbəb olmasa da, çəki artımı, 2-ci tip diabet, yüksək trigliserid, insulin müqaviməti və xroniki iltihab kimi risk faktorlarını artıra bilər. Bu amillər isə ürək-damar xəstəliklərinin inkişafına zəmin yaradır.

Vadali qeyd edib ki, “Coca-cola” və digər şəkərli qazlı içkilər, enerji içkiləri, aromalı qəhvələr və meyvə şirələri yüksək miqdarda şəkər ehtiva edir. Bu səbəbdən çayın şəkərsiz qəbul edilməsi daha sağlam seçim hesab olunur.

Kardioloqa görə, damar sərtləşməsi və damarlarda plakların yaranması uzun müddət heç bir əlamət vermədən inkişaf edə bilər. Buna görə xüsusilə risk qrupunda olan şəxslərin mütəmadi müayinədən keçməsi tövsiyə olunur.

Mütəxəssis damar sağlamlığını qorumaq üçün tam taxıllı məhsullar, paxlalılar, tərəvəz və meyvələrlə zəngin qidalanmağı tövsiyə edib.

Bundan əlavə, müntəzəm fiziki aktiv olmaq, kifayət qədər yatmaq və siqaretdən mümkün qədər uzaq qalmaq ürək-damar sağlamlığının qorunmasında mühüm rol oynayır.

Müəllif: Roza