Yeni pandemiya gəlir? - ÜST "Nipah"dan ilk ölüm hadisəsini qeydə aldı

Banqladeşin şimalında "Nipah" virusuna yoluxmuş bir qadın ölüb.

Publika.az xəbər verir ki, bu barədə "The İndependent" məlumat yayıb. Qeyd edilib ki, Ümumdünya Səhiyyə Təşkilatı (ÜST) qadının ölümünü təsdiqləyib.

Xəstədə ilk simptomlar 21 yanvarda ortaya çıxıb. Xəstəlik qızdırma, qıcolmalar və güclü baş ağrısı ilə müşayiət olunub və ardınca isə dezorientasiya, həddindən artıq tüpürcək ifrazı müşahidə edilib. Qadın bütün bu simptomlardan bir həftə sonra ölüb. Diaqnozu ölümdən sonra tam şəkildə təsdiqlənib. Xəstə ilə təmasda olan otuz beş nəfər hazırda nəzarət altındadır. Onların test nəticələri mənfi çıxıb. Yeni yoluxma halları isə aşkarlanmayıb.

Qeyd edək ki, Ümumdünya Səhiyyə Təşkilatının məlumatına görə, "Nipah" virusu infeksiyası donuz və meyvə yarasası kimi heyvanlardan insanlara ötürülən "heyvan mənşəli xəstəlikdir". O, həmçinin çirklənmiş qida ilə və yoluxmuş şəxsdən də keçə bilər.

Xəstəlik demək olar ki, hər il Asiyanın bəzi bölgələrində, ilk növbədə Banqladeş və Hindistanda baş verir.

Adətən,ölümcül olan bu virusun hələ də nə peyvəndi, nə də müalicəsi var.

Dünya Səhiyyə Təşkilatı (ÜST) "Nipah" virusunu "Ebola", "Zik"a və "Covid-19" ilə yanaşı, qlobal epidemiya yaratma potensialına görə araşdırılması prioritet olan xəstəliklər siyahısına daxil edib.

Tural