Deputat Hindistan seriallarından yazdı: Oğul istəyirəm ki...

"Hindistanın Ermənistanı dəstəkləməsi çox yaxşı xəbər oldu. Dərhal bu başlığa baxıb əleyhimə material hazırlayanlar sevincə qərq olmasınlar. Sözümün mabədi var. Bundan gözəl hansı fürsət ola bilər ki? İndi oğul istəyirəm ki, Hindistanın bu hərəkətini bəhanə edib televiziyalarımızı Hindistan filmlərini və seriallarını boykot etməyə çağırsın".

Publika.az xəbər verir ki, bu barədə Milli Məclisin deputatı Fazil Mustafa özünün sosial şəbəkə hesabında yazıb. Deputat qeyd edib ki, bu serialları böyük həvəslə izləyən qadınlarımızın çoxu bundan məyus olacaq:

"Ancaq inanın ki, belə fürsət bir də ələ düşməz. Bayağı hind filmlərindən, seriallarından canımız bir az rahatlamış olar. Beynimizi, düşüncəmizi hind filmlərinin, seriallarının işğalından azad etmiş olarıq. Televiziyalarımız da proqram boşluğunu doldurmaq üçün yeni və faydalı siyasət izləməyə çalışarlar. İşdir, əgər Hindistan ağıllanıb öz qərarını bir müddət sonra dəyişərsə, onlara minnət qoyaraq yenidən bu verilişləri arxivdən geri çağırmaq elə də çətin olmaz. Yeganə təzyiq formasıdır. Ermənistana dəstək verən Hindistana ar olsun! Uşaq vaxtı bəyəndiyim "Avara" filmini yaradanlardan başqa nə gözləyəsən?!"

Tural Turan